Usa ka fake news ang nikatap sa social media nga gidudahan nga dunay gibalbal nga mga kanding sa Sitio Unggal, Barangay Bolocboloc, lungsod sa Barili niadtong Dominggo sa kaadlawon, Agusto 7, 2022.
Giingong kasagaran sa maong mga kanding dunay lawom nga mga samad sa liog ug lubot niini agig pinaakan sa wa matino nga mananap.
Apan sa pakisusi sa DyHP ug mga tigbalita sa dakbayan sa Sugbo pinaagi sa Barili Police Station pinaagi kang Police Staff Sergeant Mindo Patilona, desk officer, nasayran nga dili tinuod nga dunay mga kanding nga nangamatay sa naasoy nga dapit.
Ang kapulisan nihimo og pakisusi sa maong barangay kagahapon, Agusto 8, ug nasuta nga walay bisan usa ka residente ang nikompirmar o niangkon bahin sa gibalbal nga mga kanding subay sa na-post sa social media.
Apan, dugang sa kapulisan, ilang nasayran sa dapit nga dunay nangamatay nga kanding nga nahitabo duha ka tuig na ang nakalabay apan ang mga hulagway gi-post sa social media ning ulahi nga gikagubtan sa netizens.
Nagtuo ang kapulisan nga ang fake news nisakay sa insidente sa usa ka barangay sa dakbayan sa Toledo nga giingong gibalbal ang mga baboy nga nangamatay.
Awhag sa kapulisan nga dili motuo dayon sa mga nanggawas sa social media kon wala pa kini nakompirmar gikan sa awtoridad.
Sa miaging semana, upat ka mga baboy ug usa ka iring ang nangamatay sa Barangay Canlumampao, Toledo nga gipangkuhaan og atay ug kasingkasing.
Hangtod karon, wala makompirmar kon balbal ba ang nagpatay sa mga baboy sa Toledo.
Apan ang maong insidente nimugna og kabalaka sa mga lumolupyo sa dapit tungod sa katingad-an nga pagkapatay sa mga baboy nga walay dugo nga naglama o nakatag sa lawas o palibot sa mga baboy sa ilang ad o tangkal.