Kapulisan sa siyudad sa Sugbo nihangop sa pagduso og balaudnon sa Kongreso sa pag-implementar sa curfew sa mga menor de edad gikan sa alas 10 sa gabii hangtod sa alas 5 sa buntag aron mahatagan sila og proteksyon gikan sa krimen ug magamit sa mga kriminal.
Ang rason niini, matod ni Bagong Henerasyon Party-list Representative Bernadatte Herrera-Dy, nga mahatagan og proteksyon ang mga menor gikan sa krimen ug kriminal base sa mga nanghitabo karon.
Apan mamahimong malikay sila sa pagdakop kon ilang kauban ang ilang mga ginikanan kon sila masakpan sa mga awtoridad nga naa pa sa gawas sa ilang balay bisan sa lawom na nga kagabhion.
“The bill seeks to mandate and strictly implement a set of hours during night time within which minors are prohibited from remaining outside of the home, not only as a means of maintaining public order and safety and preventing the further rise in criminality but also in order to protect minors from potential threat that may arise in the remote environment which may be harmful or detrimental to their development,” matod ni Herrera-Dy sa iyang pamahayag.
Si Police Lieutenant Colonel Wilbert Parilla, deputy director for administration, nihangop sa balaudnon sanglit matod niya dako og matabang ang pagpatuman sa curfew sa pagpakunhod sa kriminalidad.
Iyang gitug-an nga ang Dakbayan sa Sugbo nipatuman pa gihapon sa curfew batok sa mga menor de edad, apan magsugod sa alas 12 sa tungang gabii hangtod sa alas 5 sa kaadlawon. Apan kon mahimo na kining balaod, pabor sila sa oras.
Nipasabot si Parilla nga ang pagpatuman sa curfew sa mga menor wala nagpasabot nga pig-otan na sila sa ilang katungod sanglit gihatagan lang silag proteksyon gikan sa mga kriminal.
“Ato gyud nga makita kon duna gyuy curfew, less gyud kaayo ang krimen. Even gani kaniadto ato gyud nang gi promote sa city nga even sa mga adults sa mga hamtong nga dunay gihapoy curfew kay nakita gyud nato nga zero crime incidents during the time nga duna tay curfew,” matod ni Parilla.
Nakita ni Parilla unsa ka epektibo sa pagwagtang sa krimen ang pagpatuman sa curfew sa dihang nisaka pag-ayo ang coronavirus disease sa siyudad niadtong 2020 diin ang tanang tawo gimandoan nga wa nay mogawas gikan sa alas 10 sa gabii nga way igong tuyo.