Usa ka manhunt operation ang gilusad karon sa Inayawan Police Station batok sa managsuon nga pulos menor de edad nga gitumbok nga responsabli sa pagdunggab-patay sa 16 anyos nga tinun-an sa Natalio Bacalso Ave., Barangay Bulacao, Cebu City niadtong Sabado, Agusto 6, 2022, alas 11:40 sa gabii.
Matod ni Police Lieutenant Colonel Wilbert Parilla, deputy director for administration sa Cebu City Police Office (CCPO), nailhan ang magsuon human nadakpan ang 22 anyos nga si Jether Tabora ug duha pa ka menor de edad.
Parigla ang motibo sa krimen sanglit niadtong tungura nag-estambay lang ang lima ilawom sa skywalk sa Bulacao ug ilang nakit-an ang biktima nga si Jerome Rivera Estan, 16, taga Demasalang, Barangay Pahina Central sa dakbayan sa Sugbo, nga nagbaktas.
Dinhi na nahitabo ang parigla apan nisukol si Estan nga hinungdan nga gidunggab kini sa usa sa mga suspek.
“According sa usa ka minor during sa atoang interview is nag standby ra gyud sila didto ug nagparigla, pariglahan ra gyud to nila, according to them is tripingan lang wala silay intention nga mobuhat og ingon adto, nya naka inom sila mao na nga nahitabo sila, kay nipalag man sad tong biktima,” matod ni Parilla.
Human nahagba ang biktima, gikuha sa mga suspek ang cellular phone niini ug atol sa follow-up operation nadakpan sa kapulisan ang tulo.
Dugang ni Parilla nga nga mamahimong ipasaka na nila karong adlawa, Martes, Agusto 9, 2022 ang kasong robbery with homicide batoksa mga suspek.
Giangkon ni Parilla nga duna gyud untay police patrol nga mag-estambay sa maong lugar apan niadtong tungora nagpahigayon og checkpoint sa laing dapit nga maoy hinungdan nga nakahigayon ang maong mga batan-on sa paghimo og krimen.
Ang patrol cars sa onse ka police stations sa siyudad gimandoan nga mag-estambay sa mga dapit nga peligro sa krimen usa ani ang Bulacao.
Gikonsiderar pa hinuon kini nga isolated pa nga kaso sanglit mao pa kini ang labing unang insidente sulod sa unom ka tuig nga adunay nahitabong krimen diin ang biktima ila usab nga gipatay.
“Kon atong tan-awon kini medyo ma highlight lang gyud ni siya kay sa dugay-dugay nga panahon wala tay insidente na nga ingun ani, siguro for more than 6 years wala natay insidente nga robbery with homicide nya minor pa gyud,” dugang ni Parilla.
Si Police Senior Master Sergeant Geofrey Gutual, investigator on case, nagkanayon nga unang nitahan sa police station sa Inayawan si alyas Chubby uban sa iyang mga ginikanan.
Siya ang gipasahan sa cellular phone sa biktima sa dihang nagdinagaynay na sila aron mosibat.
Didto sa sulod sa police station iyang gitumbok nga ang naghimo sa krimen kadtong magsuon nga menor de edad.
Tungod niini, gipabukas sa imbestigador ang Facebook account niini ug didto nakita ang chat sa suspek nga nangita na sa cell phone ni Jerome kay dunay mopalit.
Gipasibat usab sila niini sanglit nailhan na sila sa mga pulis ug gimandoan nga dili moadto sa ilang balay sa Candulawan, siyudad sa Talisay.
Gumikan niini, gisubay na sa kapulisan ang mga dapit nga gitagoan sa mga suspek.