NAG-VIRAL sa social media ang lubong sa usa ka 59-anyos human giingong wala naandam sa usa ka iladong sementeryo sa Davao City ang lubnganan niini.
Si Doll Boniel Gonzales, ang pag-umangkon sa namatay, nagpagawas sa ilang kasubo ngadto sa management sa sementeryo diin sa ilang bahin, ila kining gipagawas sa social media.
Saysay ni Ms. Gonzales nga nahinabi sa Superbalita Davao Lunes sa hapon, Agosto 8, 2022, pinaagi sa telepono nga sa unang adlaw palang sa kamatayon sa iyang uyoan, giadtoan na sa ilang kabanay ang management sa sementeryo ug ipahibalo nga ilang gamiton ang ilang dugay nang naimpas nga luna.
Tuod man, sumala ni Ms. Gonzales, ilang gibayran og P30,000 ang pakalot niini, naa sa ilaha ang resibo ug ubang papeles alang sa paglubong Sabado sa hapon sa Agosto 6, 2022.
Human sa Misa sa patay, gidala nila ang minatay sa sementeryo, apan giingong giharang sila ug wala dayon gipasulod gumikan sa alegasyong niadtong Agosto 6 wala suma pa naka-schedule ang maong minatay.
Subay sa paghiling sa record, giingong naa, apan wala kini ma-report ngadto sa nagdumala sa entrance ug bisan sa mga supulturero, maong wala dayon sila nakasulod.
Saysay ni Ms. Gonzales, nga nakasulod sila pipila ka minutos gikan sa highway, apan naghulat pa sila og dul-an duha ka oras gumikan kay nagkalot pa ang mga supulturero alang sa lubnganan, gamit ang gamay nga backhoe.
Sa paglubong na, natingala ang mga kabanay nga dunay mibuto dihang usa ka dakong bato uban sa mga yuta ang gitabon sa lungon.
"Dili siya tama, human unta sa pagsulod sa lungon didto sa semento naa man gyud na'y taklob nga semento, kadto wala nila gitakluban, gidiretso lang nila'g tabon og yuta human namo og hulog sa mga bulak," ingon ni Ms. Gonzales sa Superbalita Davao.
Dihang nangasuko na ang mga tagtungod, gikuha ang lungon sa natabunan sa yuta, gidayungan ug gibalhin ang minatay sa bag-ong lungon gikan sa usa ka funeral parlor.
"Maayo nalang dali sab nga nakahatud og lungon ang usa ka funeral parlor, gibalhin dayon akong uncle, ug mga alas 5 na namo nahuman ang paglubong, pero naa nay tabon nga semento," sumpay ni Ms. Gonzales.
Human nga nalubong giingon ni Ms. Gozales nga dunay usa ka representative gikan sa admin sa maong sementeryo ang miduol kanila ug giingong naguol sa hitabo.
Buot sa mga tagtungod nga dili ingon-atuon ang pamaagi sa paglubong. Gikinahanglan nga andam ang sementeryo ug gikinahanglan nga dunay tabon nga semento una kini tabunan og yuta.
Sukad sa pagsulat sa maong balita, naningkamot ang Superbalita Davao nga makuha ang bahin sa maong sementeryo diin abli ang mantalaan pinaagi sa email niini nga superbalitadavao@gmail.com alang sa bahin sa giisyu nga sementeryo.