Usa ka German national napalgang patay na sulod sa iyang panimalay sa Purok Avocado, Barangay Pandacan, lungsod sa Pinamungajan, alas 11:30 sa buntag, kagahapon, Agusto 8, 2022.
Si John Pryke, 75, buwag sa asawa ug nagpuyo sa nahisgutang lugar, wala nay kinabuhi nga napalgan sa iyang higala.
Si Police Major Vincent Zozobrado, hepe sa Pinamungajan Police Station nga nahinabi sa Superbalita Cebu, nagkanayon nga ang biktima nag-antos nang daan sa sakit sa kasingkasing unya nag-inusara na lang kini sa iyang panimalay human nagkabuwag sa iyang asawa.
Sumala sa kapulisan, ang higala sa biktima nga si Jomar Nalzaro Estrella, 31, minyo, plant operator sa Global Corporation ug taga Purok Santan, Barangay Butong, Pinamungajan, maoy nipahibalo sa kapulisan kabahin sa iyang higalang langyaw.
Matod ni Zozobrado nga sa ilang pagsusi sa balay sa langyaw, wala nagkatag ang mga butang ug intact ang mga gamit sa panimalay ug ubang mga butang.
Nasuta nila nga walay foul play ang kamatayon sa langyaw.
Si Dr. Melochie R. Daroy - Pausal, Municipal Rural Health Officer sa Pinamungajan, maoy nihimo sa post mortem examination sa lawas sa langyaw ug nasuta nga ang namatyan niini cardiogenic shock ug congestive heart failure.