Ang Cebu City Government misugod na og guba sa mga balay nga nagpatong sa three-meter easement sa Kinalumsan River sa Barangay Mambaling kagahapon, Agusto 8, 2022.

Si Raquel Bohol-Arce, pangulo sa Cebu City Disaster Risk Reduction and Management Office (CCDRRMO), nagkanayon nga moabot sa 40 ka mga illegal structure ang nag-okupar sa maong dapit nga delikado panahon sa kusog nga baha.

Apan gibutyag ni Arce nga 15 na lang niini ang okupado sanglit gipangbiyaan na ang mayoriya nga estraktura human nakadawat og ayuda ang namuyo gikan sa Department of Public Works and Highways (DPWH).

Ang pangulo sa CCDRRMO niingon nga sa nahabiling estraktura pulos mga boarder ang nagpuyo ug wala na ang mga orihinal nga okupante sanglit gipaabangan kini.

Ang paglimpyo sa three meter easement gimando ni Rama aron dili mabutang sa peligro ang kinabuhi sa mga okupante.

Niabot ngadto sa pito ka mga balay ang naanod sa baha sa Kinalumsan River sa habig sa Duljo Fatima niadtong Huwebes sa miaging semana ug suwerte nga way kinabuhi nga nakalas.

Si Mayor Michael Rama personal nga nibisita sa Kinalumsan River kagahapon, Agusto 8, aron personal nga makita ang kalamboan sa dapit human siya nimando atol sa flag raising ceremony sa city hall sa pagpaguba sa mga balay.

Ang chairman sa committee on infrastructure ug urban planning and development sa Konseho nga si Jerry Guardo nagkanayon nga ang Kinalumsan maoy usa sa upat ka major nga suba sa siyudad nga apil sa flood control project sa DPWH.

Si Guardo nagkanayon nga ang pagmando ni Rama usa ka maayong lakang para sa siyudad nga maminosan na ang illegal settlers sanglit ang mga apektado gitanyagan og financial assistance o relocation site sa dakbayan labi na nga gusto ni Rama nga mahisama ang Cebu City sa kahan-ay sa nasod sa Singapore.