ANG Alpha Kappa Rho (Akrho) fraternity Naga Council misaulog sa ilang ika-49 nga anibersaryo sa adlaw'ng Lunes, Agosto 8, 2022.
Liboan ka mga miyembro gikan sa l54 ka chapters sa Akrho Naga Council ang misalmot sa kalihukan.
Si Police Corporal Adrian Mabida, tsirman sa Akrho Naga Council, nagkanayon nga usa sa sentro sa ilang kalihukan ang pagpang-limpyo sa kadalanan sa dakbayan sa Naga diin miabot sa duha ka tonelada ang ilang nahipos nga basura.
"More on community service gyud ta unya paga-sugdan sa santos nga misa ug motorkada," matud ni Mabida.
Ang misa gipahigayon sa simbahan sa Barangay Uling, dayon gisundan kini sa motorkada tuyok sa siyudad.
Aduna sab silay programa nga gipahigayon sa Naga City New Activity Center sa alas 8 sa gabii diin ang Akhro Band nipasundayag og mga kanta, diin ang pipila niini hinimo ra usab sa grupo.
Gipahibawo ni Mabida nga sukwahi kaniadto, ang tumong sa grupo karon mao ang pagpatigbabaw sa kalinaw ug paglikay sa kagubot.
Ang tsirman sa Akrho Naga Council niawhag niadtong gustong magpa-miyembro sa ilang grupo nga dili isalikway ang pag-tuon sanglit daku kini'g ikatampo alang sa ilang kaugmaon.
Gihimo ni Mabida nga ehemplo ang iyang kaugalingon gumikan sa iyang nakab-ot nga propesyon isip usa ka pulis nga nag-serbisyo sa katawhan. (BBT, TPT)