Alegre ning nahitabo sa lungsod sa Balilihan ug Sevilla sa lalawigan sa Bohol.
Sumala sa record, ang National Water Resources Board (NWRB) nag-issue og water permit sa LGU Balilihan. Ang permit alang sa pagkuha og tubig mainom nga adto kuhaa sa Bugwak Spring, Sto. Niño, Balilihan.
Ang nakaporke, kay didto man kuhaa ang tubig sa Bugwak Spring sa Magsaysay, Sevilla. Ang pangutana, asa man diay nahimutang ang Bugwak Spring, sa Balilihan o sa Sevilla?
Importante nga mahibaw-an kini aron maseguro nga husto ang gikuhaan sa tubig sumala sa water permit gikan sa NWRB.
* * *
Kon imong adtuon ang maong lugar, makita nimo nga mitabok sa sapa ang water pipes ug adto mideretso sa pikas bahin nga nahisakop na sa Barangay Magsaysay, Sevilla ug mao kini ang gitawag og Bugwak Spring sa Magsaysay, Sevilla.
Kon imong tan-awon sab sa mapa, makita sab nga giulang sa Loboc River ang mga lungsod sa Balilihan ug Sevilla. Buot ipasabot, sakop sa Magsaysay, Sevilla ug dili sakop sa Balilihan ang Bugwak Spring.
* * *
Tungod niini, nagpadala og sulat si Sevilla Mayor Juliet Dano ngadto kang Balilihan Mayor Pureza Chatto nga ipatangtang ang mga giagian sa tubig, apil ang nagsuporta niini, gikan sa tinubdan sa tubig sa Bugwak Spring, sa Magsaysay, Sevilla.
Nadawat ang maong sulat sa opisina ni Mayor Pureza Chatto kaniadtong Hulyo 19, 2022.
* * *
Mao kini ang katingad-an. Ngano kaha nga didto man nagkuha og tubig ang contractor sa Magsaysay, Sevilla nga klaro man kaayo sa permit nga Sto. Niño, Balilihan ang tinubdan sa tubig? Wa nasayod ang contractor niini? Ang naka-nindot ra ba kay kon imong i-Google asa nahimutang ang Bugwak Spring, mogawas dayon nga Sevilla, Bohol.
Adunay Bugwak Spring sa Balilihan pero tua sa barangay Hanopol ug dili sa barangay Sto. Niño.Mobalik ta sa mga pangutana, nganong nahitabo man kini nga mitabok sa Magsaysay, Sevilla ang mga linya sa tubig imbes adto lang unta sa Sto. Niño, Balilihan?
Wa masayod niini ang mayor sa Balilihan nga tua siya nagkuha og tubig sa lugar nga gawas na sa iyang lungsod? Ug kon nasayod man gani, nganong gipasagdan man niya nga moabot pa sa punto nga magkagubot tungod kay way pagtugot sa Sevilla ang maong illegal nga koneksiyon sa tubig?
* * *
Kinsa may dunay katungod sa tubig nga tua sa Bugwak Spring, Magsaysay, Sevilla? Siyempre, ang taga Magsaysay, Sevilla, apil na ang mga kadagkoan sa lungsod sa Sevilla. Mahimo ba nga mogamit sa tubig gikan sa Bugwak Spring ang taga Balilihan?
Mahimo kaayo, pero sa kinaraan pa, angayan pod nga manabitabi pod ka, dili kay modiretso lang ka og hamag diha. Sayop pod kaayo, para nako, nga molahos lang ang mga taga-Balilihan og tukod sa linya sa tubig didto sa Bugwak Spring nga way pupananghid sa mga hingtungdan niini.
Ug sa kinaraan pa, mora pod og way maayong pamatasan ang mohimo og sama niini. Unsa may bation sa taga-Balilihan kon dunay tubig sa ilang lugar unya molahos lang og panguha sa tubig ang ilang silingan unya dili mananghid nila, malipay sila?
* * *
Pulos mga babaye ang mayor sa duha ka lungsod. Alang nako dili lisod saboton kining maong gumonhap. Kon dunay nasayop, angkunon ug mangayo og dispensa. Dili na padak-on kay mosamot kalibog kon nganong dili mananghid sa dili pa mokuha sa tubig.
Lisod ba kini buhaton?