Usa ka motorista namatay sa dalan human sa pagpamusil atol sa usa ka road rage sa Hernan Cortes St., Barangay Subangdaku, dakbayan sa Mandaue.
Giila ang biktima nga si Roberto Estandarte, 45, kasamtangang nagpuyo sa Gentle Breeze, Barangay Subangdaku.
Si Pol. Lt. Col. Franco Rudolf Oriol, deputy city director for operations ug tigpamaba sa Mandaue City Police Office (MCPO), nitug-an sa mga tigbalita sa Martes, Agusto 9, 2022, nga si Estandarte giingong adunay kasungian tali sa usa ka four-wheeled vehicle driver daplin sa karsada.
Sa inisyal nga taho nagkanayon nga si Estandarte nagmaneho og motorsiklo uban sa iyang kauban mga alas 11 sa gabii niadtong Lunes, Agusto 8, dihang giingong hapit nadasmagan sa sakyanan sa killer.
Tungod niini, nasuko si Estandarte nga maoy nakapainit sa ilang panagbingkil tali sa drayber sa usa ka awto, kinsa kalit nga nipusil kaniya gikan sa bintana sa kilid sa sakyanan ug human daling nipadagan palayo.
Si Estandarte naigo sa walang dughan. Gidali siya pagdala sa tambalanan apan gideklarar nga patay na tungod sa kagrabe sa iyang samad. Wa maunsa ang iyang kauban atol sa hitabo, samtang ang gunman nagpabiling wa mailhi ug gawasnon.
Ang patay nga lawas sa biktima ipaubos sa autopsy alang sa dugang imbestigasyon.
Matod ni Oriol nga gisusi karon sa kapulisan kon duna bay laing motibo sa pagpamusil gawas sa nahisgutang bangi.
Ila sab nga gisuwayan pagpangita kon duna bay closed-circuit television (CCTV) cameras nga gibutang duol sa dapit nga nahitaboan nga posibleng nakakuha sa tibuok insidente alang sa dugang ebidensiya.
Nunot sa nahitabo, gipahinumdoman sa mga awtoridad ang mga motorista nga magmapailubon sa pagsulbad sa dili pagsinabtanay sa dan ilabi na sa mga drayber.