Milangkat og 32 ka rebounds si Leigh Christian Dixon aron ituboy ang Batch 2007 ngadto sa makutas nga kadaugan, 56-54, batok sa Batch 2009 sa nagpadayon nga 25th season sa Sacred Heart Ateneo Alumni Basketball Athletic Association (SHAABAA) basketball tournament niadtong Dominggo sa Magis Eagles Arena sa Ateneo de Cebu campus sa Canduman, Mandaue City.
Gawas sa rebound, si Dixon mitali usab og 21 puntos nga may upat ka blocked shots, duha ka assists ug duha ka steals aron masubhan og kadaugan ang ilang kampanya sa Division B sa maong liga.
Di pa man tuod opisyal, apan ang 32 ka rebounds posibling maoy season-record nga natali sa ika-25 nga season sa nahisgutang torneyo.
Miabag ni Dizon sila si Karl De Pio nga may 13 puntos, pito ka rebounds ug 11 puntos usab ang natali ni Brennon Kent Gothong.
Sa kapildihan, ang Batch 2009 nga gipangulohan sa 17 puntos ni Joseph Roma ug 14 puntos gikan ni Kyle Edwin Valmoria nahagsa sa 0-3 nga baraha.
Kulba da kahinam maoy midayandayan sa panagsangka sanglit kawalo gyud ka higayon nga nagpulipuli og sakmit sa labaw ang duha ka koponan.
Ang Batch 2009 maoy unang nakaposte og dakong labaw, 26-14 sa first quarter, apan hinayhinay nga mikabat ang Batch 2007 hangtod ilang nailog ang renda sa manubela, 42-38.
Gikan niadto permi nang nagtinubagay ang duha ka koponan sa pagpugnit og mga puntos ug ang gamay kahigayonan maoy gihimong lungag sa Batch 2007 nga makalusot sa kadaugan.
Sa laing duwa, yano nga gilampornas sa Batch 1996 ang Batch 2002, 86-64, sa Division A.
Bangis nga nakaduwa si Romeo Alejandro sa dihang mikawhat kini og 34 puntos nga may 12 ka rebounds sulod sa 34 minutos sa korte.
Midugang og 14 si Giovanni Borromeo samtang si Ryan Lauro maoy nangulo sa napukan nga kaatbang pinaagi sa iyang 18 puntos ug 13 ang nadugang ni Edmund Gaisano.
Nakaipsot usab ang Batch 2012 sa mga kamot sa Batch 2018, 92-88. Si Adven Jess Diputado mikolektag 29 puntos, Maverick Fritz Suarez may 13 ug 12 puntos ang nahimo ni Alexted Dan Tecson.
Si Errol Paster ug Benedict Chua nagkumboya og 46 puntos alang sa Batch 2018.
Girehistro usab sa Batch 2014 ang ilang ikatulong sunodsunod nga daog, 67-58, batok sa Batch 2019.
Si Lucky Ecarma mipugnit og 29 puntos, siyam ka rebounds ug 18 puntos usab ang naugkat ni Giovannie Laguyo.
Topscorer usab si Mark EJ Dumandan sa Batch 2019 nga may 17 puntos. (JBM)