Ang Cebu City Government gikatakdang motiwas og bayad sa P960 milyones nga maoy nahabiling bayranan sa paghimo sa 300 ektarya nga South Road Properties (SRP) karong Agusto 29, 2022.
Kini ang gipahibawo ni Atty. Jerone Castillo, special assistant to the mayor, human ilang nakumpleto ang mga dokumento nga gikinahanglan para mahimong legal ang ilang pagbayad aron wala nay utang ang Dakbayan sa Sugbo.
Si Castillo nagkanayon nga ang certificate of full compliance gikan sa Bureau of Local Government Finance (BLGF) maoy ilang gipaabot ug positibo sila nga mahatag kini sa dili pa ang gikatakdang petsa.
Ang pagbayad sa nahabiling utang gikan sa 12.315 bilyon Japanese Yen nga gi-loan sa Cebu City Government niadtong 1995 sa Japan International Cooperation Agency (JICA) ipahigayon dinhi sa dakbayan sa Sugbo pinaagi sa Land Bank of the Philippines.
Ang maong loan kaniadto nagkantidad og P4.65 bilyones apan gumikan sa pagsaka sa US dollar sugod niadtong 1995, nidoble usab ang utang sa Cebu City sanglit magbase kini sa dolyar ug dili sa Japanese Yen. Karon, ang exchange rate naa sa labing minos P56 batok dolyar.
“This is high time, this is in accordance with good fiscal management nga bayran na gyud na siya para we will spare the City from further economic shock,” matod pa ni Castillo.
Ang special assistant to the mayor nga si Castillo nagkanayon nga kon nabayran pa sa Cebu City ang P2.4 bilyones nga nahabiling utang sa SRP niadtong 2015 nga maoy gusto ni Rama, maka-save unta ang Dakbayan human malampuson niyang nabaligya ang 45 ektaryas nga luna sa SRP og dul-an P16 bilyones.