Usa ka incoming Grade 11 nga tinun-an nga lalaki nga taga Barangay Jubay, Lungsod sa Liloan, Sugbo gibiktima sa duha ka bayot sa dihang giingong pugsanon kining gipaduwa sa kinatawo sa usa sa mga suspek.
Ang insidente nahitabo niadtong Dominggo, Agusto 7 sa gabii samtang nagbaktas pauli ang biktima gikan nga nisimba sa lungsod.
Si Police Major Ramil Morpos, hepe sa Liloan Police Station, nitug-an sa Superbalita Cebu nga ang 15 anyos nga lalaki nitaho sa ilang buhatan sa mga alas 11:30 sa gabii sa Dominggo, kuyog ang inahan.
Nalangay og report ngadto sa pulis ang biktima tungod kay iya pang gipaabot ang iyang inahan nga makauli gikan sa trabahoan.
Ang mga suspek giila ni Morpos nga sila si Jonel Alin Palang, 28, LGBTQ member, usa ka bank messenger, taga-Purok Nangka, Barangay Garing, Lungsod sa Consolacion.
Iyang kauban giilang si Rennard Rosales Sumotia, alyas Hannah Rosales, 25, food vendor, taga Barangay Labogon, dakbayan sa Mandaue.
GISIGNIT
Matod ni Morpos nga sa ilang imbestigasyon, ang biktima nag- inusara og lakaw pauli gikan nga misimba samtang sila si Palang ug Sumotia nag-atang sa kalsada. Giingong giduol ang biktima ni Palang dayon gipangutana kon usa ba siya ka ‘princess.’
Sa dihang namalibad ang 15-anyos, gikuptan kini ni Palang dayon gihikaphikap ang pribadong bahin sa iyang lawas.
Gumikan sa kakurat sa batan-on, wa na siya nakapalag ilabi na nga anaa sa iyang luyo si Sumotia.
Giingong pugos nga gipaangkas sa motorsiklo ang batan-an ug gidala sa kalibunan.
Matod pa ni Morpos nga gihuboan ang biktima ni Sumotia ug gipugos sa pag-blow job sa kinatawo ni Palang nga nagkuha sab og picture ug video sa gihimo sa batan-on.
Samtang si Sumotia nagsilbing lookout. Pagkahuman, gipasakay og balik ang biktima sa motorsiklo ug gihatod sa eskina duol sa iyang gipuy-an.
NAG-FRIEND REQUEST
Si Police Senior Master Sgt. Karen Arcelo, Chief Women and Children’s Protection Desk (WCPD) sa Liloan Police Station nga nahinabi sa Superbalita Cebu sa Agusto 9, nagkanayon nga ilang nasubay ang mga suspek pinaagi sa Facebook page.
“Di nila buhian ang biktima, papaulion kon dili silang duha i-add sa ilang FB page. Among nasubay, natultolan ang mga bayot,” asoy ni Arcelo. Ang biktima nga gamayon, gwapo, kinsa usa ka tuig pa lang naabot sa lugar gikan sa Manila.
Nagkabuwag ilang mga ginikanan hinungdan nga giuban siya sa iyang inahan ug lain niining igsuon dinhi sa Sugbo. Ang biktima nibutyag nga nahadlok siya sa duha nga kusgan kaayo. Wala sab siya masuhito sa dapit hinungdan nga wala siyay nahimo.
Sumala ni Arcelo, nga na-recover nila sa suspek ang cell phone nga naa ang video sa biktima nag-blow job sa kinatawo ni Palang ug mga hulagway.
Gawas niini duna pay daghang video ug pictures sa suspek uban sa laing mga batan-ong lalaki nga nag-sex.
Ang duha pasakaan og kasong acts of lasciviousness nga may kalambigitan sa Republic Act 7610 kun Special Protection of Children Against Abuse, Exploitation and Discrimination Act ug Republic Act 9995 kun Anti-Photo and Video Voyeurism Act nga may kalambigitan gihapon sa R.A. 7610.