ANG Talisay City Health dili mopugos sa mga estudyante nga motungha sa limited face-to-face classes karong umaabot Agosto 22, 2022 sanglit wala pay mandu nga ilang nadawat gikan sa Department of Education ug Department of Health.
Matud ni Dr. Lino Alanzado, pangu sa Talisay City Health, nga mag-agad lang sila sa order sa ilang labaw kay dili man sila kapugos sa pagpa-booster niadtong mga estudyante nga gusto'ng motungha sa klase.
Hinuon gipasabot ni Alanzado nga wala pay available nga booster shots ang ilang buhatan alang sa mga bata nga nag-edad ug 5 ngadto sa 11 anyos.
Ang anaa lang kanila nga mga booster shots ang para sa mga bata nga 12 anyos pataas.
"Kon dili sila mo-avail dili ta kapugos pero naa gihapon mi booster 12 and up, naa gihapon mi booster house-to-house sa Lagtang from Monday to Wednesday, naa pud sa Star Mall," matud ni Alanzado.
Si Alanzado nidugang nga sa kasamtangan, ang City Health Talisay wala pa hinuoy gihimong mga lakang aron awhagon ang mga batan-on sa pagpabakuna.
"Probably kon mosugot ang mga school authorities moadto ta sa mga schools alang sa pagpanghatag og booster shots," si Alanzado nagkanayon.
Ang Talisay City Health nakabakuna na ug kapin sa usa ka libo nga mga bata nga nag-edad 12 anyos pataas. (BBT, TPT)