ANG Department of Public Works and Highways (DPWH) 2nd District Division nipadayag nga motabang sila og pintal sa mga pedestrian lanes sa kadalanan sa siyudad sa Talisay nga duol sa eskwelahan isip pagpangandam sa pagsugod sa limited face-to-face classes karong Agosto 22, 2022.
Si DPWH District Engineer Leslie Anthony Molina, atol sa interview sa mga tigbalita sa Martes sa buntag, Agosto 9, nagkanayon nga ila nang masugdan sunod semana ang pagpamintal.
"Masugdan na namo next week, karon nga bulan ato na nang ipatuman," matud ni Molina.
Una nang nagtagbo sila si Molina ug mga kadagku-an sa Traffic Division sa dakbayan sa Talisay ug sa uban'g siyudad diin ilang gihisgutan ang paghatag og prayoridad ang pagbutang og pedestrian lanes sa mga karsada duol sa tunghaan ingon man pagpintal og usab niadtong mga hanap nga pedestrian lanes diin anhi motabok ang mga bata padulong sa eskwelahan.
Matud ni Molina nga sa pagkakaron wala pa hinuon silay plano kon asa nga eskwelahan sa Talisay ang ilang unahon, pero kon adunay mga tunghaan nga morequest kanila ila kining tagaan og pagtagad.
"Kon magbutang mi ug mga pedestrian lanes along the national highway unahon gyud na namo ang duol sa eskwelahan," dugang ni Molina.
Sa mga tunghaan sa sudlonon nga barangay nga mo-request pagpabutang og pedestrian lane, ila usab kini'ng hatagan ug pagtagad, matud sa enhinyero.
"Pero bisan dili sila mo-request basta along the national highway kami na lang mohimo ana at our own initiative isip pagtabang sa mga eskwelahan," si Molina miingon.
Gawas niini, ang DPWH andam usab nga motabang pagpintal sa mga lawak sa tunghaan lakip na ang mga ginagmay mga pandayonon. Dunay mga personnel ang DPWH sa ilang maintainance section nga makatrabaho niini mag depende sa request sa mga principal sa matag eskwelahan.
"Ang atong maintainance personnel karon na-busy lang gyud kay sige man ug ulan pero naa mi tanan motabang mi unsay mga pintalanan didto sa mga eskwelahan," dugang ni Molina.
Apan gipasabot ni Molina nga dili sila makapasalig og tabang niadtong mga tunghaan nga adunay dagku'ng trabaho-on sanglit kinahanglan kini og daku nga budget. (BBT, TPT)