Di mominos 30 ka mga pamilya ang gipabakwit sa Cebu City Disaster Risk Reduction and Management Office (CCDRRMO) tungod sa risgo sa pagdahili sa yuta ug pagbaha sa duha ka mga barangay sa Miyerkules, Agusto 10, 2022.
Ang hepe sa CDRRMO nga si Raquel Arce nitug-an sa SunStar Cebu nga 22 ka mga pamilya ang gipapahawa sa ilang mga balay sa Barangay Budlaan human sa mga timailhan sa pagdahili sa yuta nga posibleng mosangpot sa landslide.
Napulo ka mga pamilya usab ang gipabakwit sa Barangay Buhisan isip preemptive measure batok sa posibleng pagbaha tungod kay nahimutang sila sa daplin sa sapa.
Matod ni Arce nga ang tanang apektadong mga pamilya gipapuyo sa ilang barangay evacuation center samtang giabagan sa Department of Social Welfare and Services sa dakbayan.
Matod ni Arce, ang walay hunong nga pag-uwan sa miaging mga adlaw maoy nakaingon sa paghumok sa yuta.