CARLITO MANTUA
c/o DepEd, Ormoc City, Leyte
Dapiton ko kamo sa pagpanginhas
Kay wanang na kaayo ang hunas
Andama ang guná, pagdag payâ
Ilugit sa bagâbâ, sudlan sa kuhâ!
Bungkawil, budyong, bulalong, saang
Sisi, sihi, sigay, lagang
Lusod, liswi, lapas, dalipsot
Taktakon, tagimtim, takubo, bungkot.
Alisto, hubas na ang balirong!
Bata, dagko maghuhon, alirong!
Hinaya pagtaak, suhot di matugaw
Makahigop na ta og tam-is nga sabaw.
Danggit, bantol, butete, balighot
Budloy, barunday, bulinaw, burot
Muong, tabugok, muymoy, banghutin
Tikab, tamarong, tambaliog,
samin-samin.
Panginhas dili malas ni suwerte
Sa kartiyog kakugi ra magdepende.
Kon mopauli ka nga walay nadawdaw
Magbakho gyud ang gibilin mong bahaw.