ANA RUTCHELL SANDOT
Dumanjug, Cebu
Mao ni ang nabaniog nga sulti-sulti sa among mga silingan. Nga kining bag-ong salta dinhi sa baryo Bagakay usa ka ungo. Ambot lang pod kon tinuod ba gayud ning ilang estorya kay sa tan-aw nako morag dili man ungo si Jojo. Hilumon si Jojo ug di gani motingsi kon akong tagdon. Misteryuso pod kay kon imbitahon namo siya sa pista sa among baryo, dili man motunga.
Talagsa ra pod nako siya makit-an nga mogawas, ug kon mogawas man gani magsul-ob kini og taas nga sinina nga halos matabunan tanang panit.
“Unsa man kanang imong gihunahuna, Dong Bensoy? Kalalom ba niana?” Naigking ko sa akong nahimutangan sa pagkabati ko sa pulong sa akong apohan.
“Kuan, Lo, motuo ka ba og ungo?,” nangutana ko.
“Kon ako lang ang pasultion, Dong Bensoy, dili gyud ko motuo niana, gawas kon makakita ko mismo sa iyang buhatong pagpamalbal og biktima, ma-tawo man o ma-mananap Nituo ka seguro sa mga sulti-sulti sa atong mga silingan, no, bahin kang Jojo?,” ni Lolo.
“Wala man, Lo. Ganahan lang ko makahibalo sa imong pagtuo,” tubag ko.
Nanglabay ang mga adlaw nga wala na nako panumbalinga ang mga tsismis sa among mga silingan. Labi na kang Nang Titang nga magbula-bula lang ang baba inigsulti.
Nianang pagka sunod adlaw nagselebrar ko sa akong adlaw nga natawhan. Adunay gamay nga salo-salo ang gihimo. Pinangga ko sa akong Lolo. Siya ang nag-atiman nako sukad nitaliwan ang akong ginikanan ug si Lola. Nag-asal si Lolo og baboy ug nag-ihaw og duha ka kanding. Nangimbitar kami sa among mga silingan. Nakahunahuna ko pag-imbitar kang Jojo.
Samtang nagpadulong ko sa balay ni Jojo, nasugatan nako si Nang Titang.
“Uy, Dong Bensoy, maayo kay nia ka. Kahibawo ba ka nga nagtuwad-tuwad si Jojo gahapon sa ilang tugkaran. Kilumkilom na gyud kuno,” ni Nang Titang. “Unya niadtong miaging mga adlaw may nakakita kuno kaniya nga daghan kaayog dugo ang iyang kamot sa udtong tutok. Segurado ko nga siya gyud ang nipatay sa atong binuhi nga mga manok!”
“Unsa kana katinuod, Nang Titang? Basin og nasayop lang mo. Moadto ko ron sa ila kay dapiton nako nga adto sa among balay manihapon aron ikadungan nato sa atong salo-salo.”
“Uy, ayaw gyud tawon kana buhata, Dong Bensoy! Tingalig matakdan ta!” ni Nang Titang nga nagkisdom ang nawong.
Wala nako panumbalinga si Nang Titang. Milahos ko sa ilang Jojo.
“Ayo, Jo! Naa ka dinha?” misinggit ko pag-abot nako sa tugkaran sa ilang balay.
Walay mitubag. Katulo ko motawag apan wala gihapoy mitubag. Duna koy nakita nga nag-aso didto sa luyo sa balay. Milipot ko sa luyo sa balay, ug akong nakita si Jojo nga nagtuwad sa ilang bungon. Nangurog ko sa akong gibarugan. Buot kong modagan.
Nakamatikod diay si Jojo Kanako. Milingi siya sa akong gibarugan.
“Uy, Bensoy, nia lagi ka? Unsay ato nimo?” ni Jojo nga mapahiyumon.
“Jojo, nag-unsa man ka diha?” Nagkurog kong nangutana. “Nganong nagtuwad ka man? Tinuod ba ang ilang gisulti nga usa ikaw ka ungo? Birtdey nako karon. Mianhi ko aron pag-imbitar nimo nga adto sa amoa manihapon.”
“Bensoy, magtuwad gyud ko dinhis among tugkaran kon mangita kog sibog-sibog. Tigumon ko man ni kay akong ipatuktok sa akong binuhi nga mga manok,” matod ni Jojo.
“Niadtong ganing nangaging mga adlaw, nagkadugo akong kamot kay gibangtas sa usa ka iro ang akong binuhi nga mga manok. Kon wa ko masayop, iro ni Nang Titang ang nangaon sa mga manok dinhis atong baryo.”
MITUNGA si Jojo sa among balay aron moapil sa salo-salo sa panihapon uban sa among mga silingan. Nanglipaghong si Nang Titang kay nahibaw-an nga ang iyaha diayng iro ang nagbangtas sa mga manok dinhi sa among baryo. Ug nahibaw-an pod sa tanan nga dili ungo sa Jojo.
(KATAPUSAN)