Organizers sa ‘Pasigarbo sa Sugbo’ ningkonsiderar sa pagpatuman sa signal shutdown atol sa pasundayag sa Cebu City Sports Center (CCSC) sa Agusto 28, 2022.
Si Cebu Governor Gwendolyn Garcia nianunsyo niini sa Agusto 9, Martes, atol sa tigom sa kadagkoan sa lalawigan sa Capitol Social Hall.
Sama sa Sinulog Festival, gikonsiderar usab sa Kagamhanan sa Probinsya ang pagmuntar og signal jammers sa sulod isip kabahin sa security measures niini.
“We will have to jam the signal within Abellana grounds because it’s possible we might have VVIPs (very very important persons) around,” matod ni Garcia.
Ang maong kalihukan live nga i-broadcast sa Sugbo News.
Gipasabot ni Garcia nga kon mopatuman sa pagbutang og signal jammers sa CCSC, mahimong motan-aw ang mga Sugboanon ug uban pang viewers pinaagi sa himuong livestreaming online.
Una na nga gipahibawo sa kagamhanan nga mosagop na sa bag-ong pamaagi nga online voting alang sa himuong pasundayag sa contingents.
Mas maagni ang mga Sugboanon ug viewers nga mo-vote online, gipahibawo sa gobernador nga dunay usa ka brand new nga sakyanan isip grand prize sa modaug nga voter.
Aron modaug, dugang sa gobernador, gikinahanglan nga motan-aw sa tanang lima ka segments sa pasundayag ug mobotar sa matag segment.
Duna kini quick-response (QR) code nga ipakita sa livestream aron magiyahan ang mga mobotar sa online.
Ang botante nga makapili sa modaog nga contingent maoy hatagan og kahigayonan nga makaapil sa raffle.
Nasayran nga 50 ka mga LGU ang moapil sa Pasigarbo sa subay month-long celebration sa ika-453 nga kasumaran sa pagka lalawigan sa Sugbo.