'Love scam' misiaw

SunStar file
SunStar file

DAGHAN gihapon ang giingong biktima sa "love scam" diin sagad sa mga mailad mga edaran.

Sumala sa Bureau of Customs (BOC) nga dili sila manawag ug moingon nga adunay package nga kinahanglan bayaran nga anaa kanila.

Hinuon andam kanunay ang BOC nga motabang sa paggiya sa nabiktima ug mas maayong motawag una sa ilang buhatan ug i-verify ang hitabo ug dili mopadala og salapi ngadto sa nagpakaaron-ingnong hinigugmang foreigner.

Atol sa gipahigayong Kapihan sa Philippine Information Agency (PIA), ang Bureau of Customs-Davao District subling nagpasidaan ngadto sa publiko nga mag-igmat sa mga modus online nga magpailang usa sila ka military foreigner ug buot na niining magminyo og Pinay.

Subay sa monitoring sa BOC-Davao District, liboan na ang midangop kanila ug nagpangutana sa mga package nga gipadala kuno sa foreigner nga anaa sa ilang buhatan.

Modus niini, pahulogon og salapi ang biktima aron suma pa maproseso sa BOC ang pagdala sa bagahe padung sa biktima.

Una niini, magpadala og mga hulagway ang mga langyaw sa mga butang nga kuno naa sa package nga dawaton sa hinigugma nga iyang gibiktima.

Matud ni BOC District Collector Atty. Erastos Sandino nga di lamang kini problema sa Davao Region apan nahitabo sab kini sa tibuok nasud.

Sumala sa BOC nga masulbad lamang kini nga problema kung ang usa ka gibiktima kahibabawo nga mosubay kung unsa ka lehitimo ug unsa ka tinuod ang iyang ka-kontak nga usa ka langyaw. (Uban sa taho ni Edith Isidro, PIA-Davao)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph