Suma sa Local Finance Committee (LFC) sa Cebu City nga apiki kaayo karon sa panalapi ang Siyudad tungod sa dako kaayong nagasto sa milabay nga duha ka tuig itandi sa nakita niini. Suma sa LFC nga sa tuig 2020 ug 2021, migasto ang Siyudad og kapin sa P10 billion ug mikita kini og P16,093,586,608.24. Apil sa report ang halin sa South Road Properties (SRP) sa 2020 ug 2021 nga P9,252,126,9.97.
Niadtong Hunyo 2022, sa dihang nilingkod si Mayor Mike Rama sa iyang bag-ong termino, nabinlan na lang siya og P4.5 billion apan kuwang kaayo kini ibayad sa utang sa Siyudad nga mokabat og P8 billion, suma sa LFC. Ang katarungan nga gihatag niining kahimtang karon sa panalapi sa Cebu City hall mao ang pandemic.
Ang nakaparat niini kay ang mabuthan na sab niini mao ang mga taga-siyudad kang kansang buluhisan gihuna-hunaang patas-an.
Apan di ba duna may gibayran nga mga kontraktor sa Cebu City Medical Center (CCMC) nga gikuwestiyon sa Commission on Audit (COA)? Nganong dili man kadto bawion? Duna usay mga kuwestiyonableng pagpamalit nga gidili sa COA, dili ba kadto pabayran sa malapason?
Daghan pa kaayong salapi sa Siyudad nga giwari-wari lang sa atong ubang opisyal nga wala lang masiloti. Karon si Juan dela Cruz ang magbayad sa dili nila salaud.
* * *
Unsa man katinuod kining nabaniug kaayong tsismis sa kaulohan nga usa kuno ka dakung opisyal sa gabinete ni Presidente Fedinand “Bongbong” Marcos ang nagtinil og kapin 60 ka mga bank accounts, apil na sa mga overseas banks. Nagsugod kuno kining dagkong mga salapi, dollars ug euros, niadtong panahon sa kampanya.
Naa nay gidudahan ang pipila sa sakop sa media kon si kinsa kining maong opisyal tungod kay mireklamo kuno ang usa ka religious organization nga nangayo kuno kini og P100 million aron lang matudlo sa gobiyerno ang usa nila ka sakop.
Gibisita siya sa taga-media sa iyang buhatan aron tan-awon kon tinuod ba nga mi-resign na kini. Giimbestigar na kuno kining maong opisyal. Hinaut pang ipahibawo sa katawhan ang resulta sa imbestigasyon kay tingalig mapagan hinuon ang Presidente niining iyang binuhatan.
* * *
Akong balikon sa pagpahibawo si Mayor Mike Rama nga adunay mga studies kalabut sa drainage project ang nagastuhan na sa Siyudad. Anaa usay pagtuon nga gihimo sa Department of Public Works and Highways (DPWH) ug sa Metro Cebu Development Coordinating Board (MCDCB).
Mas maayong atong ibasi kini sa mga pagtuon sa mga eksperto kaysa band-aid solution lamang. Kon gikinahanglan i-update lang kini. Mahimo man nga tigumon ni Mayor Rama ang mga mayor sa Metro Cebu aron ilang hisgutan ang usa ka integrated drainage system nga gisugdan na sa MCDCB).
Pinaagi niini ila usab nga mahisgutan ang pagpangita og tinubdan sa pundo alang niining maong dakung proyekto. Magamit sa mayor ang iyang pagka-presidente sa League of Cities. (mannyrabacal1144@gmail.com)