Marcos wa miaprobar sa pag-angkat og asukar sa abroad

Gisalikway ni Presidente Ferdinand “Bongbong” Marcos Jr. ang gisugyot nga importasyon sa 300,000 metric tons (MT) nga asukar tungod sa pagkunhod sa suplay sa nasud nga niresulta sa pagsaka sa mga presyo niini, matod ni Press Secretary Trixie Cruz-Angeles sa Miyerkules, Agusto 10 , 2022.

“The President rejected the proposal to import an additional 300,000 MT of sugar. He is the chairman of the Sugar Regulatory Board and denied this in no uncertain terms,” matod ni Cruz-Angeles.

Una niini, si Agriculture Undersecretary ug tigpamaba nga si Kristine Evangelista niingon nga ang proposal naggumikan sa kakuwang sa suplay human sa pagkuso-kuso sa Bagyong Odette (Rai) niadtong Disyembre 2021, partikular na sa mga tanom nga tubo sa mga apektadong lugar.

Sa pagkakaron, anaa na sa P90 matag kilo ang presyo sa asukar, apan dunay mga merkado nga nagbaligya niini og P120 ngadto sa P150 matag kilo.

Samtang, ang grupo sa mga mag-uuma nga Sinag, nga una nga nakigtagbo ni Marcos aron hisgutan ang daghang mga isyu, nidayeg sa desisyon sa Presidente, nga nagpahibawo nga ang mga mag-uuma sa asukar nagsugod na sa pag-ani.

“It is high time for the Sugar Regulatory Board and the Department of Agriculture to support our local producers,” matod ni Sinag executive director Jayson Cainglet.

“We should not go back to the previous practice of importing at first instance. We should import only what is needed and upon the explicit approval of the local industry,” dugang niya. (TPM sa SunStar Philippines)