Giduso na ni Cebu 5th District Rep. Vincent Franco “Duke” Frasco ang pag-regulate sa pagbaligya og mga lungon.
Sa iyang gisang-at nga House Bill 102 o ang Affordable Casket Act, gitataw ni Frasco nga buot niya nga maseguro nga aduna unyay desente nga lungon ang mga kabus nga dili molapas sa P20,000 ang presyo niini.
Sa nasayran, magdepende sa materyales ug disenyo, ang labing minus nga lungon nagkantidad og P5,000 hangtod sa labing mahal nga mobalor og kapin P200,000.
Nalatid sa iyang giduso nga balaudnon nga mag-atubang og multa nga dili molabaw sa P200,000 ug suspensiyon sa license to operate hangtod unom ka bulan ang si kinsa man nga molapas niini.
Kon padayon kining mosupak sa lagda, posible usab nga mag-atubang kini og multa nga moabot na sa P400,000 ug ingon man ang pagpatangtang sa lisensya.
Naglaum ang kongresista nga uyonan kini sa plenaryo aron pagtabang sa mga kabus nga namatyan.