Nidoble ang gidaghanon sa mga menor de edad nga naluwas atol sa pagpatuman sa curfew sa ikaduhang gabii sa pagbalik sa Oplan Bulabog sa kapulisan sa siyudad sa Sugbo.
Sa unang operasyon, 34 ka mga menor ang nasikop nga nagsugod sa kaadlawon sa Miyerkules, Agusto 10, 2022, ug alas 10:00 sa gabii sa samang adlaw, nagsugod na ang ikaduhang operasyon hangtod sa alas 4:00 sa kaadlawon kagahapon, Agusto 11, 2022.
Ang operasyon gisugdan sa mga alas 10:00 sa gabii subay sa ordinansa sa curfew niadtong 2020 nga gipirmahan ni anhing Mayor Edgardo Labella.
Matod ni Police Lieutenant Colonel Wilbert Parilla, deputy city director for administration sa CCPO, magpadayon na kini labi na nga ilang nabantayan nga nagkadaghan ang mga menor de edad nga nanggawas na sa ilang panimay panahon sa kagabhion.
Giseguro nila nga dili na masubli ang nahitabo sa 16 anyos nga tinun-an nga gitulis-patay sa grupo sa mga batan-on sa Brgy. Bulacao sa Sabado sa gabii, Agusto 6, 2022.
“Karon, nagsugod na ta sa 10 o’clock sa pagpatuman sa ordinansa... sa curfew,” matod ni Parilla.