Duha ka mga tighatod og gidiling drugas o giilang “kabayo” sa drug lord ang nasikop sa buy-bust sa dalan N. Bacalso, Sityo San Vicente, Barangay Bulacao, dakbayan sa Sugbo, pasado alas 9:00 sa gabii sa Miyerkules, Agusto 10, 2022.
Kini ang paghulagway sa duha sa nangulo sa operation nga si Intelligence Agent 1 (IA1) Jessie Cabutotan.
Ang duha nga pulos ex-convict mao sila si Rey Steven Buenavista, 29, lumolupyo sa naasoy nga dapit, ug Jonel Añasco, 44, lumad nga taga lungsod sa Buenavista, Probinsiya sa Bohol.
Matod ni Cabutotan, ang target sa ilang operasyon mao si Buenavista apan si Añasco naabtan sa mga ahente sa Philippine Drug Enforcement Agency (PDEA) 7.
Nasakmit gikan sa duha mao ang gidudahang shabu nga motimbang og 105 gramos ug mobalor og P714,000 base sa standard drug price (SDP) sa Dangerous Drugs Board (DDB)
Niangkon si Añasco nga niadtong buwan sa Hulyo 2022, nakagawas siya sa bilanggoan human sa 10 ka mga tuig nga pagkapriso sa kasong murder ug qualified theft.
Napatay niya ang iyang kaila niadtong Hulyo 2012 sa dalan Tagunol, Barangay Mambaling, dakbayan sa Sugbo.
Samtang si Buenavista kanhi piniriso usab sa Cebu City Jail (CCJ) niadtong 2020 sa kasong pagpamaligya ug paghupot gihapon og ginadiling drugas nga kalapasan sa Republic Act 9165 kun Comprehensive Dangerous Drug Act of 2002.
Si Buenavista nakagawas sa prisohan niadtong bulan sa Abril 2022 ubos sa pagtugot sa korte human nakapiyansa.
Apan, sumala ni Cabutotan, wala pa nahuman ang iyang unang kaso, bag-ong kaso bahin sa drugas ang atubangon na sab niini.
Ang duha ninghimakak nga ila ang mga binulto nga drugas, apan niangkon nga gisugo sila sa paghatod niini.
Ang tigpamaba sa PDEA 7, Leia Alcantara, nagkanayon nga dul-an sa duha ka semana ang ilang pagpaniid kang Buenavista una gihimo ang operasyon.
Dugang ni Alcantara, makonsiderar si Buenavista nga citywide high value target sanglit ang transaksiyon niini naa sa kabarangayan sa dakbayan sa Sugbo.
Nasuta usab sa PDEA 7 nga si Buenavista bata-bata sa drug lord nga naglihok sa dakbayan apan wala una gibutyag ang pangalan kay duna silay himuong operasyon.
Ang duha kasamtangang gibalhog sa rehiyonal nga selda sa PDEA-7 alang sa dugang imbestigasyon ug nagpaabot usab sa pagpasaka og tukmang kaso batok kanila.