ANG gisugyot nga ordinansa sa siyudad nga magmugna ug Persons with Disabilities Affairs Office (PDAO) sa Davao City nakakuha og positibong reaksiyon gikan sa grupo sa persons with disabilities (PWDs).
Niadtong Hulyo 26, 2022, atol sa regular session sa 20th Council, gisugyot ni Konsehal Alberto Ungab ang PDAO Ordinance isip hangyo pinaagi sa suwat gikan sa Citywide Federation of Persons with Disabilities Inc. (CFPDI).
Matud ni Ungab nga ang suwat sa CFPDI, nagtumbok sa pag-establisar sa Republic Act No. 10070 o ang gimando nga PDAO wala pa sa siyudad.
Subay sa Republic Act No. 10070, matag probinsiya, siyudad, ug munisipalidad kinahanglan nga mag-establisar og PDAO, ug ang 4th, 5th, ug 6th class municipalities magtudlo og focal person aron nga maoy moabaga sa mga tahas sa PDAO.
"Nalipay mi ug excited kaayo almost all of the councilors na naka-istorya namo to pass the PDAO Ordinance. In fact, we have distributed our draft proposal sa mga PWDs," pahayag ni Atty. Rani Leonar, convenor sa Alyansang PDAO, atol sa AFP-PNP Press Conference sa Royal Mandaya Hotel niadtong Agosto 10, 2022.
Apan matud ni Leonar nga ang sunod nga kinahanglanon mao ang alokasyon sa badyet alang sa pag-establisar sa buhatan nga mogasto og P30 milyon.
Dugang ni Leonar, ang pagpalabang sa PDAO Ordinance mohatag og dugang oportunidad aron nga makakuha og suporta ngadto sa mga PWDs gikan sa mga langyaw ug lokal nga tinubdan.