NAGPAHIMANGNO ang Municipal Disaster Risk Reduction and Management sa Davao Occidental nga mag-igmat ang mga manglaba sa sapa ug bantayan ang kahimtang sa panahon.
Kini human nga patay ang usa ka babaye human gianod sa tubig baha sa Jose Abad Santos, Davao Occidental Lunes sa buntag, Agosto 8.
Giila ni Municipal Disaster Risk Reduction and Management Officer nga si Ariel Acosta ang biktima nga si Jenny Dawang, 30.
Sa imbestigasyon, samtang nanglaba ang biktima sa sapa sa Sitio Upper Kilakay, Barangay Butulan, kalit nga mikusog ang tubig ug naanod ang biktima.
Sa dagat na nakuha ang biktima pagka-alas 11 sa buntag nga wa nay kinabuhi.
Daghan na sab ang mga nataho sa Davao Region nga dunay mga hitabo sa kalit nga pagbul-og sa tubig sa sapa gikan sa bukid gumikan sa walay hunong nga mga pag-ulan sa ibabaw nga bahin.