BAG-ONG gawas sa prisohan ug giingong notadong kawatan ang gipusil-patay, suma sa kapulisan sa Sta. Ana Police Station.
Sa impormasyon, nasayran nga gipusil sa wala pa mailhing mamumuno ang biktima alas 11 sa Huwebes sa buntag, Agusto 11, samtang sakay kini og dyip didto sa Piapi Boulevard, Barangay 22-C, Davao City.
Ang biktima giila ni Police Lieutenant Colonel Ronald Lao, Station Commander sa Sta Ana Police Station, nga si Paul Jhon Dizon Ferraren.
Sumala ni Lao nga kauban sa biktima ang iyang inahan nga si Jocelyn ug ang iyang live-in partner nga si Emily samtang nagsakay sila og dyip dihang usa ka wa mailhing lalaki ang mipusil sa biktima sa makadaghang higayon.
Diha dayon nahagba ang biktima, kinsa nakagakos pa sa iyang kapuyo.
Patay nang nahidangat sa Southern Philippines Medical Center (SPMC) ang biktima, kinsa gideklara nga dead on arrival sa mga doktor.
Tulo ka mga basiyo sa bala sa 9 milimetro nga pistola ang narekober sa kapulisan sa nahitaboan.
Gisulti ni Lao nga ang biktima iladong mangunguot ug kawatan, diin bag-o lang kining nakagawas sa prisohan.