Mipakatap og tag 17 puntos sila si Chaz Cokaliong ug Anton Araw-araw, midugang og 13 puntos ug napulo ka rebounds si Steven Co samtang 11 puntos usab ang nahagdaw ni Daniel Kahn Gillamac sa dihang gipakaging sa Storage Town-Batch 2015 ang Ardak Powersports-Batch 2020, 75-68, sa nagpadayon nga Sacred Heart Ateneo Alumni Basketball Athletic Association (SHAABAA) Season 25 Division C sa Magis Eagles Arena sa Ateneo de Cebu campus sa Mandaue City, Miyerkules sa gabii, Augusto 10, 2022.
Kulba dalang kahinam maoy mahulagway sa maong panag-engkuwentro nga gidayandayan og pipila ka mga higayon nga nagpulipuli og sakmit sa labaw ang duha ka koponan.
Human sa duha ka mga quarters, ang Ardak Powersports nga gibituonan nil ani Mitch Ivan Almodal kinsa mipaksit og 19 puntos ug Zeke Swayze Himaya nga mitali og 18, maoy nakaposte og siete puntos nga labaw, 40-33.
Apan ang momentum sa duwa hinayhinay nga midap-ig ngadto sa Storage Town human kini nakahagsa og 15-6 nga rally aron imbarguhon ang bintaha, 57-53. Di pa igo, ila pa kining nabingat ngadto sa 69-59, nga labaw nga maoy nagwahing sa dalan paingon ngadto sa ilang ikaduhang kadaugan.
Sa laing duwa, gikastigo sa Starkwood Properties Inc.-Batch 2009 ang Marjaztin Glass Trading (2008), 83-70 sa Division B.
Si Kyle Edwin Valmoria maoy nangulo Starkwood pinaagi sa iiyang 26 puntos, siyam ka rebounds ug pito ka assists samtang idlas usab nga misuporta kaniya sa scoring si Niel Benedicto kinsa mikolekta og 18 puntos ug pito ka rebounds.
Sa pildirong habig, si Ed Bonphyl Bacasling mitali og 26 puntos samtang si Jonathan Edmond Cimafranca nakahipos og 24 puntos.
Ang 2009 nakaposte sa ilang pinakadako nga labaw ngadto sa 26 puntos, 62-36.
Sa Division C, gilabni sa Asian Orthopedics (2014) ang ilang ikaupat nga sunodsunod nga kadaugan pinaagi sa paglampornas sa Casa Mira-2021, 96-59.
Yanong naglawig paingon ngadto sa kalampusan ang 2014 nga gani wa kini makasinatig bisan anino na lang sa pagpanghudlat. Sa halftime, nakaposte na kini og 15 puntos nga labaw, 48-33, ug wa na gyud kini molingi pa.
Si Gio Laguyo mikulit og 20 puntos nga may lima ka assists, si Lucky Ecarma midugang og 14 puntos, siyam ka rebounds ug unom ka assists.
Bugtong sila si Rey Marcus Fuentes ug Walter Franz Yu ang nakakayud og maayo sa Casa Mira 2021 nga may 16 puntos ug 10 nga pasunod. (JBM)