Gidaghanon sa mga menor de edad nga nakalapas sa curfew ug giluwas atol sa ikatulong gabii sa pagpatuman sa Oplan Bulabog sa kapulisan nagkaubos na kon itandi sa mga na rescue sa milabay nga operations.
Sa data nga gipahibawo ni Police Lieutenant Colonel Wilbert Parilla, deputy city director for administration sa Cebu City Police Office (CCPO), naka rescue lang sila og 28 ka mga bata itandi sa 68 sa ikaduhang gabii ug 34 sa unang pag balik sa oplan.
Nagtuo si Parilla nga nasayod na ang kadaghanan sa mga menor de edad nga estrikto na usab ang kapulisan sa pagpatuman sa ordinansa sa curfew nga maoy hinungdan nga sayo na nga manguli.
Giklaro hinuon ni Parilla nga kadtong mga menor de edad nga naa pa sa gawas bisan sa lawom na nga kagabhion apan uban ang ilang mga ginikanan dili ra i-rescue.
Ang ilang gipangrumbo karon mao kadtong mga imnanan ug internet café nga nag operate og 24 oras nga ilang sudlon matag gabii.
Kon masuta nga nagpasulod sila og mga menor de edad ang mga internet café ug mga imnanan, moduso og report ang kapulisan ngadto sa Kagamhanan sa Dakbayan sa Sugbo aron makanselar ang business permit sama sa ilang gihimo atol sa pagsaka sa mga kaso sa coronavirus disease.
“Ato na ni iapil, just like sa una, nga tanang establishments like internet café nga ilaha gihapong gi-tolerate ang mga minor nga magpabilin sa ilang establishment so we will make necessary reports sa city,” matod ni Parilla.
VIDEOKE BADLUNGON
Samtang mo-roving usab ang kapulisan sa mga sudlonong bahin sa kabarangayan aron ipatuman ang mando ni Police Brigadier General Roque Eduardo Vega, hepe sa kapulisan sa Central Visayas, labot sa pag badlong niadtong mga nag videoke kon lapas na sa alas 10 sa gabii.
Matod ni Parilla nga dunay ordinansa ang Siyudad batok sa pagsaba-saba sa lawom nang gabii nga nakatugaw sa mga silingan ilabi na nga hapit na usab mobalik ang klase.
Apan giangkon ni Parilla nga dili kini mahimo sa kapulisan kon way abag sa mga barangay tanod.