NITUNOL na og pasiunang tabang ang lokal nga panggamhanan sa mga apektadong mga pamilya sa grabeng pagbaha sa lungsod sa Pikit, Cotabato Province kon diin duna nay gikataho nga duha ka tawo ang namatay.
Unang biktima mao ang 6-anyos nga si Alimoden, nagpuyo sa Barangay Kalbugan, Pikit.
Nasayran nga ang bata mihikling tungod sa baha, uban sa iyang inahan ug 4-anyos nga igsuon, dihang kalit nga natikyaob ang gisakyan nilang bangka hinungdan sa pagkalumos niini ug daling gidala ngadto sa tambalanan apan wala na maluwas.
Ang ikaduhang namatay sa baha mao si Guiamona Alim Mamadra, 38-anyos nga nagpuyo sa Sitio Salaked, Barangay Talitay sa mao gihapong lungsod.
Si Mamadra nalumos sa ilang balay tungod sa lapas sa tawo nga baha ug wa na maluwas aron nga makabakwit.
Sa pagsuwat ning balita, taas pa ang lebel sa baha sa lungsod sa Pikit sa pag-awas sa Pulangi River nunot sa walay puas nga pag-ulan tungod sa nagkulismaot nga lakat sa panahon.