DUHA ka mga senior citizens ang gihiusa sa salag sa kaminyuon niadtong Martes, Agusto 9, 2022, didto sa lungsod sa Banay-Banay, Davao Oriental.
Gikasal mao sila Igloria Tabuan, 71, ug Ceriaco Maputol, 64.
Ang mayor sa lungsod mismo sa Banay-Banay, Lemuel Ian M. Larcia maoy mihiusa sa duruha sa kaminyuon sa buhatan sa mayor sa Municipal Building.
Gibutyag nga makita sa panagway sa bag-ong kinasal ang kamaya ug kalipay, nagpamatuod nga ang tinud-anay nga gugma'g pagbati wala'y gpiling edad ug panahon.
Gitambungan sa mga kabanay, kaparyentehan ug mga higala sa kinasal ang mahalandumong okasyon sa ilang kinabuhi ug ang contender sa "Tawag ng Tanghalan" nga si Mae Ann Macunlay Cabigas nga molupyo sa lungsod mihalad og maanindot nga awit alang sa bag-ong kinasal.
Giingon nga taliwa sa pag-awit ni Cabigas, wa kapugngi sa bag-ong kinasal ang mga luha nga midagayday gikan sa ilang mga mata.
Ang mga luha, luha sa kalipay nga mitigbabaw taliwa sa tinud-anay nga gugma'g pagbati.