WALA na katingog pa dihang nasakpan ang usa ka giingong barangay kapitan ug kauban niining usa ka mag-uuma human nakuha sa ilang posisyon ang usa ka tooter ug armas, alas 9:10 sa gabii, Agosto 11, didto sa checkpoint sa Sirawan, Toril, Davao City.
Sumala sa Toril Police Station, ang mga suspek sakay sa usa ka puti nga Ford Ranger pasulod sa Davao City, apan dihang miagi sa checkpoint ug gitsek sa mga sakop sa Task Force Davao, migimaw ang usa ka sling bag nga dunay kadudahang sulod.
Dihang nangutana ang mga personahe sa Task Force-Davao sa sulod sa sling bag, nagduha-duha na og abli ang mga nahisgutan, butang nga ila kining giayo'g hiling.
Nasuta nga usa ka pusil ang sulod niini ug dunay mga buhing bala nga walay igong dokumento ingon man usa ka tooter.
Mga dinakpan mao sila alyas Along, 36-anyos, minyo, mag-umma ug taga La Filipina, Tagum City ug usa ka alyas Ronald, 52-anyos, giingong kapitan nga taga Sultan Kudarat.
Ang duruha kasamtangan nga gikustodiya sa Toril Police Station samtang giandam ang kasong paglapas sa Republic Act (RA) 9165 kun Comprehensive Dangerous Drugs Act of 2002 ug ang RA 10591 kun Comprehensive Firearms and Ammunition Regulation Act.