USA ang patay samtang usa ang naangol human natabunan ang balay sa midahili nga yuta Biyernes sa kaadlawon, Agosto 12, 2022, didto sa Upper Mesolong, Talaingod, Davao del Norte.
Giila sa Davao del Norte Provincial Disaster Risk Reduction and Management Office ang mag-asawa nga biktima nga sila Liloy Linsagan, kinsa namatay atol sa insidente, ug ang iyang asawa nga si Evelyn Linsagan, samdan ug daling gidala sa ospital sa Kapalong.
Nataho sab ang unom ka mga balay nga nangadaut tungod sa landslide.
Giingon nga perteng gubaa sa balay sa magtiayon diin atol sa hitabo, dead on the spot ang bana samtang nagpangayo og pakitabang ang asawa human kini maipit.
Nasayran nga resulta kini sa sagunsong ulan nga maoy hinungdan sa paghumok sa yuta nga miresulta sa landslide.
Anaa na sa evacuation center ang mga residente nga namakwit human nadaut ang ilang mga balay.
Nagpadala na sab og tabang ang lokal nga panggamhanan sa Talaingod.