Gamay ang purohan nga mag-abot pagbalik sa ring si boxing legend Floyd Mayweather ug mixed-martial arts star Conor McGregor.
Mao kini ang gibatbat ni Ultimate Fighting Championship (UFC) President Dana White atol sa iyang Q and A session sa GQ Sports.
Matod pa sa big boss sa UFC nga di na angay moaway ang Irish fighter nga si McGregor sa retiradong boksidor nga si Mayweather.
Ang duha ka legends sa combat sports nag-abot niadtong Agusto 26, 2017 sa usa ka professional boxing match sa T-Mobile Arena sa Paradise, Nevada.
Pulos mibulsa og dakong kwarta ang duha ka fighters. Si Mayweather nakakuha og $289 milyones o P14.4 bilyones samtang si McGregor mikita og $130 milyones P6.5 bilyones.
“McGregor-Mayweather 2 is not supposed to happen. Should not happen. Hopefully won’t happen,” matod ni White.
Dugang pa ni White nga naguba ang boksing tungod sa tinguha sa mga fighters nga makakuha og dagkong kwarta pinaagi sa exhibition fights.