Tinguha sa San Miguel Beermen nga tapuson na sa Game 6 ang semifinals series batok Meralco Bolts sa Philippine Basketball Association (PBA) Philippine Cup karong adlawa sa Smart Araneta Coliseum.
Bitbit sa Beermen ang taas nga kadasig human nila gipalong ang Meralco Bolts, 89-78, sa Game 5 niadtong Biyernes aron labnihon ang 3-2 nga labaw sa best-of-seven semis series.
Ang pagsirado sa series maoy tinguha karon sa Beermen aron malikayan ang nahitabo niadtong 2019 PBA Philippine Cup quarterfinals, diin gibuno sa Bolts ang inilog nga Beermen nga adunay twice-to-beat advantage.
“Ilang beses na nila kaming pinahiya, tinalo nila kami while having the twice-to-beat advantage,” batbat ni Beermen head coach Leo Austria.
Suwayan sa Beermen pagpalong ang kuryente sa Bolts karong alas 4:30 sa hapon.
“We’ll be ready,” matod ni Beermen guard Jericho Cruz, kinsa mipakatap og 17 puntos gikan sa bench aron tabangan ang iyang team sa Game 5.
Gilauman nga mopakita og maayong performance si CJ Perez tungod sa iyang nindot nga duwa niadtong Biernes diin mihimo kini og 25 puntos, siyam ka rebounds ug lima ka assists.
Lakip sa mga pambato sa Beermen mao ang 6-time Most Valuable Player June Mar Fajardo, Simon Enciso ug Vic Manuel.
Magsalig ang Meralco nila ni Chris Newsome, Allein Maliksi, Cliff Hodge ug beterano nga si Reynel Hugnatan aron mopugong sa tinguha sa Beermen.
Sa lain nga series, suwayan pag-usab sa TNT Tropang Giga nga tapuson na ang Magnolia Chicken Timplados Hotshots human sila napakyas niadtong Biyernes, 97-105, sa Game 5.
Usa ka daog nalang ang kuwang sa TNT, 3-2, aron moabante na sa Philippine Cup Finals.
Magsalig ang TNT nilang Mikey Williams, Roger Pogoy, Jayson Castro, Troy Rosario ug Poy Erram, samtang ang Magnolia mosandig nila ni Calvin Abueva, Paul Lee, Ian Sangalang, Mark Barroca ug Jio Jalalon.
Si miaging duwa, mikamada og 25 puntos, unom ka rebounds ug upat ka assists si Barroca samtang si Abueva miamot og 16 puntos, 10 rebounds ug lima ka assists alang sa Magnolia.
Si Castro maoy nangulo sa TNT nga adunay 18 puntos.
Ang Game 6 sa TNT ug Magnolia sugdan alas 6:30 sa gabie sa susamang venue.