Kapulisan sa siyudad sa Sugbo hugot sa pagpangandam sa pagbukas sa klase sa Agusto 22, 2022 diin pipila ka mga publikong tunghaan mag face-to-face na sa ilang mga tinun-an.
Usa sa gipangandaman sa kapulisan, matod ni Police Lieutenant Colonel Wilbert Parilla, deputy city director for administration sa Cebu City Police Office (CCPO) ang posibling pagdasok sa mga tinun-an.
Tungod niini, gitahasan ni Parilla ang station commanders nga makig- alayon sa kadagkoan sa mga tunghaan nga sakop sa ilang hurisdiksyon aron maplanohan nila kon unsay angay nga buhaton.
Gitinguha sa kapulisan nga mapatuman ang minimum health standard sa kabataan nga mobalik na sa eskwelahan sulod sa kapin duha ka tuig tungod sa pag-igo sa pandemic.
Dugang ni Parilla nga magpaabot sila kon unsay plano sa Emergency Operations Center (EOC) apan ang kapulisan magbutang og mga personnel sa matag tunghaan.
Lakip sa ilang hatagan sa pagtagad ang kahuot sa dagan sa trapiko sa gawas sa mga eskwelahan ug kriminalidad.
Tungod niini, ibalik na sa CCPO ang motor riding unit (MRU) nga taodtaod na usab nga wala nagamit aron moabag sa matag police station sa pagpatuman sa kahusay ug kalinaw sa matag tunghaan.
“Ang atoa, more police presence, atoang gi utilize tanan. Bisan karon gani ato nang gi hinayhinay og paayo ang atong mga motor kay we are planning nga atong ibalik tong atoang MRU,” matod ni Parilla.’
Awhag lang sa kapulisan ngadto sa mga ginikanan nga pasul-obon kanunay sa facemask ang ilang kabataan kon naa na sila sa sulod sa eskwelahan malikayan ang tinakdanay sa virus.