Limitahan lang una ang makasulod aron makasaksi sa nabantog nga dancing inmates sa Cebu Provincial Detention and Rehabilitation Center (CPDRC) panahon nga buksan na kini og balik sa mga bisita.
Subay sa gipahigayong re-launching sa dancing inmates sa Biyernes sa buntag, Agusto 12, gikalipay ni Cebu Governor Gwendolyn Garcia ang pagbalik sa maong programa.
Ang inmates ningpresentar sa ilang sayaw sama sa mga kantang Jump (for My Love) sa The Pointers Sisters, Do You Miss Me, They Don’t Really Care About Us ni Michael Jackson ug ang Mabuhi nga kanta alang sa Sugbo.
Nangulo sa pagtudlo kanila ang Cebuano choreographer nga si Ed Hayco.
Gawas sa pagsayaw, may kahigayunan na usab nga makakat-on ug makapanginabuhi ang inmates pinaagi sa pagpaubos kanila sa trainings nga pangulohan sa Technical Education and Skills Development Authority (TESDA) ubos sa National Certification (NC) II level sa kursong cookery, pastry, baking ug uban pa.
Kini gihimo aron sa higayon nga makagawas na ang piniriso, duna kini nakamahoan nga skills nga magamit sa pagpanginabuhi.
Aron usab nga may kuwarta nga magamit sa pagsugod sa bag-ong kinabuhi, giandam usab sa Kapitolyo ang ilang tagsa-tagsa ka savings account aron kon dunay donasyon ug kita sa livelihood sa inmates, bahinon kini sa mga nagtrabaho.
“...aron mahalin, ato nang pangitaan og market sa gawas or ari ra mismo sa ilang tindahan og unsay kita ana, adto sad na ideposito sa ilang mga tagsa tagsa ka mga savings account,”matod ni Garcia.
“If you notice, kaning ilang mga uniporme, tinahi nani nila. So, bayran pod to ang mga nagtahi. Gi-providan nato sila og sewing machines,” dugang niya.
Sa pagkakaron, wala pay petsa nga gibungat ang kagamhanan sa hingpit nga pagbukas sa ganghaan alang sa mga live audience. Libre hinuon ang pagtan-aw, apan modawat usab og donasyon.
Kasamtangan na nga giandam sa kagamhanan ang paagi sa pagtan-aw sa dancing inmates ilabi sa mga turista. Gilaraw sa gobernador nga kon mahimo, ipaagi sa tour package ang live nga pagtan-aw.