Gihulagway nga bodegero sa usa ka drug personality nadakpan sa mga operatiba sa Station 4 sa Mandaue City Police Office (MCPO) pasado ala 1 sa kadlawon sa Sabado, Agusto 13,2022.
Si Police Captain Armil Caloscos, hepe sa Station 4 nga nahinabi sa Superbalita Cebu, nibutyag nga ilang nadakpan atol sa pagpangronda si John Alex Villaraza, 18, nagpuyo sa Carreta cemetery sa Barangay Carreta, Siyudad sa Sugbo.
Ang anti illegal drug operations gipahigayon sa ala 1:30 sa kaadlawon sa M.L. Quezon, Barangay Cabancalan, Dakbayan sa Mandaue. Si Villaraza nakuhaan og kapin sa usa ka kilo nga shabu nga mobalor og P10.2 milyones subay sa standard drug price (SDP).
Matud ni Caloscos nga usa ka buwan nilang gi-monitor si Villaraza ug usa ka semana ang pagsuway og palit kaniya og 100 gramos nga shabu. Gihulagway si Villaraza nga Regional High Value Individual (RHVI) tungod sa nasakmit nga shabu.
Samtang sa laing anti-illegal drug operation sa Barangay Lagtang, Dakbayan sa Talisay, usa ka Jessica Estrella Espra, 37, kasamtangan nga lumolopyo sa Barangay Ermita, siyudad sa Sugbo nasikop sa mga operatiba sa Provincial Intelligence Unit(PIU)sa Cebu Police Provincial Office (CPPO).