Ang 25 sa 80 ka mga barangay sa dakbayan sa Sugbo naapektuhan sa kusog nga pagbunok sa uwan nga nisangpot sa nagkadaiyang insidente sama sa pagbaha, pagkankan sa yuta ug landslides sugod niadtong Agusto 4 hangtod 12, 2022.
Hangtud alas 5 sa hapon sa Biyernes, Agusto 12, namatikdan ni Cebu City Disaster Risk Reduction and Management Office (CDRRMO) Head Raquel Arce ang kinatibuk-ang 67 ka insidente sa pagdahili sa yuta, baha ug rescue operations.
Base sa iyang report ngadto kang Cebu City Mayor Michael Rama, niabot sa 136 ka mga pamilya nga gilangkuban sa 541 ka indibidwal ang naapektuhan sa pagbunok sa uwan sa nahisgutang mga adlaw.
Hinuon giklaro ni Arce nga walay namatay bisan og adunay usa ang naangol human gianod sa baha sa Kinalumsan River, Barangay Mambaling niadtong Huwebes sa gabii, Agusto 4.
Mokabat sa 18 ka barangay sa dakbayan sa Sugbo ang gikatahong gisanapan sa tubig baha nga nakaapekto sa dili mominus 102 ka mga pamilya o 429 ka indibidwal.
Ang labing uwahing pagdahili sa yuta gikatahong nahitabo sa daplin sa dalan paingon sa Sitio Laya, Barangay Kalunasan mga alas 4:30 sa hapon sa Biyernes, nga nag-aghat sa mga responder sa pag-instalar sa mga warning device ug caution tape tungod kay dili pa kini maagian.
Gibahaan usab ang karsada sa dalan Villagonzalo ug Tejero Elementary School mga alas 4:45 sa hapon sa samang adlaw, nga dili usab maagian tungod sa kusog sa bul-og.
Gikataho usab ang pagkabanlas sa yuta sa samang adlaw sa Sitio Tabok, Barangay Pit-os, Sitio Tawagan ug Sitio Langub ug Proper sa Brgy. Sirao.
Niadtong Agusto 12, ang dalan sa Sityo Lower Lamakan, barangay Pung-ol Sibugay dili na maagian nianang hapon tungod sa landslide ingon man ang Barangay proper Sirao.
Mokabat sa 111 ka mga balay ang gikataho nga naguba, 86 niini partially damaged ug 26 ang totally damaged o naguba sa maong mga panahon.
Sa ihap, kadaghanan o 26 niini gikan sa Barangay Buhisan; 25 ang nangaguba tungod sa pagdahili sa yuta ug gikatahong gibanlas nga mga balay; 21 ka balay sa Barangay Pit-os; tagsa ka balay sa Barangay Buhisan, Banilad, Binaliw, ug Pulangbato; pito sa Barangay Sirao; 19 ka balay sa Barangay Budlaan; ug walo sa Barangay Pung-ol Sibugay.
SUNOD SEMANA
Posibleng molanat pa hangtod sunod semana sa tibuok Visayas ang uwan tungod sa local thunderstorms, matod sa opisyal sa Pagasa Visayas sa Sabado.
Si Engr. Si Al Quiblat, hepe sa Pagasa Visayas weather bureau, nitug-an sa SunStar Cebu nga hinay ngadto sa kasarangan ug usahay kusog nga uwan, posibleng masinati pa sa umaabot nga mga adlaw.
Base sa thunderstorm advisory nga giluwatan sa Pagasa Visayas alas 2:16 sa hapon sa Sabado, kasarangan ngadto sa kusog nga pag-ulan inubanan sa kilat ug kusog nga hangin tungod sa thunderstorms posibling magpadayon usa ngadto sa duha ka oras sa ibabaw sa Sugbo, partikular sa Naga City, San Fernando, bahin sa Toledo City, bahin sa Balamban, bahin sa Carcar City, bahin sa Aloguinsan , bahin sa Pinamungajan, ug bahin sa Minglanilla.
Apektado usab niadtong Sabado ang ubang bahin sa Sugbo, lakip ang Mandaue City, Cebu City, Consolacion, Talisay City, Minglanilla, Naga City, Balamban, Toledo City, Asturias, Tabuelan, Tuburan, Borbon, Sogod, ug Danao.
“Partly cloudy to at times cloudy inubanan sa mga pat-ak na kalit-kalit nga pag-ulan (light to moderate at times heavy) tungod sa local thunderstorm,” matod ni Quiblat base sa ilang forecast sa Sabado ug Dominggo, Agusto 14.