Barrita: Serbisyo alang sa dunay mental health disorder

Barrita: Serbisyo alang sa dunay mental health disorder

Usa ka buang sa sud sa mental hospital naabtan sa doktor nga namasol sa planggana.

Doktor: “Nag-unsa ka?”

Buang: “Namasol, doc.”

Doktor: “Unya, nakakubit na kag isda?”

Buang: “Buang man tingali ka, doc. Kita kang planggana ni. Asa man kag isda diri?”

Gitestingan ang mga pa- syente sa mental hospital. Nag-drawing ang doktor og pultahan sa bungbong.

Doktor: “Kadtong gustong mopauli, makagawas na mo.”

Nagtinukmoray ang mga pasyente paingon sa pultahan. Apan dihay usa nga nagtan-aw lang.

Doktor: “Nganong wa ka moapil?”

Pasyente: “Mga buang na sila, doc. Wa sila kahibawo nga akoy nagkupot sa yawe.”

Gipagawas ang usa ka pasyente sa mental hospital kay iyang giluwas ang laing pasyente nga hapit malumos sa swimming pool.

Apan gipahibawo siya sa subo nga hitabo nga ang iyang giluwas naghikog ug namatay. Matod sa pasyente, “Doc, wa intawon to maghikog oy. Ako ra man tong gibitay aron mauga kay nabasa man.”

Daghan ang mga pasiaw bahin sa mga tawo nga dunay deperensiya sa pangisip. Ang uban kanila atong makita nga mosuroy nga maghubo sa kadalanan. Ang uban mangligid sa mga aseras.

Way nag-atiman. Gikan sa mga paryente, ngadto sa mga opisyales sa kagamhanan. Diha pay higayon nga gipangkarga sa bus sa siyudad sa Sugbo ang mga tawong may deperensiya sa pangisip ug gipamuhian didto sa mga bukirang barangay sa siyudad.

Way mental hospital sa Sugbo. Limitado usab ang lugar sa psychiatric ward sa Vicente Sotto Memorial Medical Center sa siyudad sa Sugbo, ang labing dakong hospital sa gobyerno dinhi sa Sugbo ug sa Central Visayas.

Apan kinahanglan ba nga kadtong dunay mga problema sa pangisip moabot sa higayon mga maglaruy-laroy sa atong kadalanan?

Didto sa dakbayan sa Mandaue, si Konsehal Nerissa Soon-Ruiz misang-at og usa ka ordinansa aron maghatag og serbisyo sa mga dunay suliran sa pangisip, lakip na niadtong anaa sa drug addiction recovery.

Si Soon-Ruig, usa ka doktor ug chairperson sa committee on health sa Mandaue City Council, niingon nga ang mental health services di lang alang sa mga buang kon di apil usab sa mga tawo nga miagi sa mapait nga kasinatian tungod sa pandemiya, nabiktima sa violent crimes o nag-antos sa tumang kaguol.

Alang sa tanan, mag-amping gyud ta sa atong panglawas. Kay dunay ginaingon sa Latin nga “Mens sana in corpore sano.” A sound mind in a sound body. Nihit na sab kaayo ang kahoy nga duldol nga gamiton sa pagtangkol.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph