Aron di malimtan ang iyang legasiya sa Philippine sports, ang memorial wall ni kanhi Asia Sprint Queen Lydie De Vega ibutang unya sa Philippine Olympic Committee (POC) Museum sa New Clark City sa Capas, Tarlac.
Mao kini ang gisaad ni POC President Abraham “Bambol” Tolentino sa pamilya ni De Vega sa iyang pagbisita sa haya sa Heritage Park in Taguig City.
“Lydia’s legacy will forever be remembered. So we, the POC, are planning to put all her achievements on a wall inside the Olympic museum,” sulti ni Tolentino ngadto sa inahan ug anak ni de Vega.
Dugang pa ni Tolentino nga ang achievement ni de Vega sa Southeast Asian Games, Asian Championships, Asian Games ug uban pa kay ibutang ngadto sa museum aron mahimong inspirasyon sa mga atleta.
Namatay si De Vega niadtong Agusto 10 niining tuiga sa edad nga 57 tungod sa breast cancer.
Si De Vega usa sa dominante nga sprinter sa Asya sa dekada 80. Midaog siyag gold medals sa Asian Games sa 100-meters sa 1982 New Delhi ug 1986 Seoul.
Daghan pud siyag nakuha nga gold medals sa Asian Championships’ sa 100-meter ug 200-meter sprints sa tuig 1983 ug 1987.