Kusog nga kuryente ang gipaigo sa Meralco Bolts ngadto sa San Miguel Beermen, 96-92, sa Game 6 sa Philippine Basketball Association (PBA) Philippine Cup semifinals Dominggo sa gabii didto sa Smart Araneta Coliseum.

Ang layup ni Aaron Black nga napakapinan pa og foul maoy gahatag og labaw sa Bolts, 93-90, sa nahabiling 31 segundos sa duwa.

Nakasikit ang Beermen, 92-93, human mapasulod ni CJ Perez ang duha sa iyang tulo ka free throws.

Aduna pa untay tsansa ang Beermen dihang usa lang ang nasulod nga free throw ni Black sa 0.5 segundos nga habig, apan wa makahimo og opensa ang Beermen ug nailog ni Kier John Quinto ang bola.

Gi-foul pagbalik si Black ug niining tungora nasulod na niya ang duha ka free throws aron itali ang final iskor sa duwa ug inaton ang semifinals series ngadto sa kulbahinam nga Game 7.

Si Chris Newsome maoy nangulo sa Bolts sa iyang 19 puntos, pito ka rebounds ug tulo ka assists. Si Black miamot og 17 puntos, lima ka rebounds ug unom ka assists.

Ang big man sa Bolts nga si Cliff Hodge mitunol og 17 puntos ubanan sa 12 ka rebounds, samtang si Chris Banchero ug Raymond Almazan midugang og 13 ug 11 puntos.

Ang Bolts naggukod sa maong duwa ug didto lang sila nakatilaw og labaw sa ikaupat nga hugna.

Mihunat ang Beermen sa unang hugna sa duwa pinaagi sa makabungog nga 33-22 run nga gitimonan ni CJ Perez, Marcio Lassiter ug June Mar Fajardo.

Nagpabiling mainiton ang Beermen sa ikaduhang kuwarter aron gunitan ang 56-45 nga labaw sa halftime.

Didto na sa second half misugod og paak sa labaw ang Bolts og human sa layup ni Chris Newsome nakasikit sila 59-62. Ang Bolts mihimog 26-18 run aron tapuson ang third quarter sa iskor nga 71-74.

Nakalabaw na unta og 10 ang Beermen, 88-78, human sa jumpshot ni Fajardo sa 5:34 sa fourth quarter. Apan mibuylo ang Bolts sa uwahing lima ka minutos sa duwa aron mailog ang duwa.

Si Fajardo maoy nangulo sa Beermen sa iyang 23 puntos ug 13 ka rebounds.