Kapin sa P8 milyunes nga balor sa illegal drugs ang nasakmit ug tulo ka mga tawo ang nasikop sa managlahing operasyon sa kapulisan sa mga dakbayan sa Sugbo ug Toledo ug lungsod sa Liloan sa Sabado, Agusto 13, 2022.
Sa Barangay Das, Toledo, ang 35-ansyos nga si Raffy Hermona nasikop sa pagpamaligya og gidiling druga sa Sabado sa gabii.
Si Hermona lumad nga taga Sitio Cotcot, Barangay Mabini, dakbayan sa Cadiz, Negros Occ., sumala ni SSgt. Fredenil CabaƱero, desk officer sa Toledo City Police Station. Gikonsiderar siya nga high-value individual sa regional level drug personalities.
Ang kapulisan gipangulohan ni Lt. Col. Dennis de Guzman ug usa ka joint team sa Police Intervention Unit ug Provincial Drug Enforcement Unit sa Cebu Provincial Police Office (CPPO) nisikop kang Hermona sud sa iyang balay nianang alas 7:00 sa gabii.
Nasakmit sa awtoridad ang 1.1 kilos nga gidudahang shabu nga nagkantidad og P7,484,828; P1,000 nga marked money; P3,000 cash nga gituohang halin sa illegal drug trade; ug drug paraphernalia.
Apan si Hermona gikataho nga nihimakak nga iyang kadtong mga drugas nga nasakmit sa kapulisan
CEBU CITY
Sa 3:30 sa hapon sa dakbayan sa Sugbo, usa ka senior citizen ang nadakpan human nakaikyas sa pipila ka higayon nga operasyon sa kapulisan.
Si Dolores Quijano Aro, 66, nadakpan sa mga sakop sa Criminal Investigation and Detection Group (CIDG) Mandaue Field Unit, City Mobile Force Company sa Cebu City Police Office (CCPO), 1st Philippine Mobile Force Company sa Cebu Provincial Police Office (CPPO), Regional Intelligence Unit 7 ug Consolacion Police Station sa Block 1, Belgium St., Barangay Suba.
Si Aro kasamtangang gitanggong sa CIDG 7 stockade.
Sa alas 10 sa gabii, laing suspek ang nasikop sa buy-bust along Archbishop Reyes Ave. sa Barangay Luz, siyudad sa Sugbo.
Ang suspek mao si John Gerard Ventura, 33, taga Sitio Abellana sa samang barangay.
Matod ni Maj. Joeffre Grande, team leader sa Regional Police Drug Enforcement Unit 7, maoy nangulo sa operasyon.
Nasakmit gikan sa suspek, kinsa kanhi waiter, ang 155 ka gramos sa gidudahang shabu nga balor og kapin sa P1 milyunes.
Dihang gipangutana, si Ventura niangkon nga namaligya sa gidiling drugas human naagni sa bayad nga P3,000 o P4,000 matag adlaw.
Sayo sa Sabado, nasikop si Jerome Alburo, 38, uban sa iyang live-in partner nga si Hilda Cullamat, 47, ug Francis Valendez, 35, sa Barangay Parian ug Francis Valendez, 35, sa Barangay Kamagayan sa dakbayan sa Sugbo.
Ang mga operatiba sa Parian Police Station nakasakmit sa 16 gramos sa shabu nga balor og P108,000 gikan ni Alburo, Cullamat ug Valendez.
LILOAN
Samtang, nasikop sa anti-narcotics operations sila si Alvin Viageador, 39, usa ka drayber ug Wilfredo Bibanco, 33, sa Barangay Poblacion, lungsod sa Liloan, alas 11:00 sa buntag sa samang adlaw diin nakuha ang 10 gramos nga shabu mobalor og P68,000.
Ang mga dinakpan gikatak- da nga pasakaan og tukmang kaso karong adlawa, Agusto 15, 2022. (GDC, BBT / PJB)