Gidaghanon sa pagbuhos sa ulan sa tibuok lalawigan sa Sugbo sa miaging duha ka semana nilapas na sa gibanabana nga gipaabot ning buwan sa Agusto 2022.
Si Al Quiblat, hepe sa Philippine Atmospheric, Geophysical and Astronomical Services Administration (Pagasa) Visayas, nagkanayon nga ang rainfall volume sa duha ka semana niabot og 230 millimeters (mm) diin iyang gikonsiderar nga “above normal.”
Matod ni Quiblat kagahapon, Agusto 14, 2022, ang normal average rainfall para sa Agusto naandan nga anaa sa 157.9 mm sulod sa miaging 30 ka tuig.
Apan sa Agusto 3 lang, matod ni Quiblat, nitala ang Pagasa Visayas og 107 mm nga ulan ug 66 mm nga ulan sa Agusto 4.
“The monthly average was breached in just two days of rainfall. That doesn’t include the rain recorded on other days,” matod ni Quiblat.
Dugang ni Quiblat, ang ilang forecast ning buwana nga “abnormal” nga ulan tungod usab sa La Niña phenomenon, diin hinungdan sa pagbunok sa ulan sa Pilipinas ug silingang kanasoran.
Ang weather bureau niluwat og pamahayag niadtong Abril 2022 nga ang La Niña phenomenon sa Pilipinas moigo sa buwan sa Hunyo ug moluntad sa Agusto ning tuiga.
Samtang, ang ngalan nga La Niña gikan sa pulong Espanyol nga the girl o ang babaye.
Ang La Niña, namugna tungod sa naandang bugnaw nga temperatura sa Equatorial Pacific, usa kini ka oceanic ug atmospheric phenomenon nga katugbang sa El Niño nga nasinati usab sa ubang bahin sa kalibotan nga El Niño–Southern Oscillation climate pattern.
Sumala sa Pagasa Visayas, ang La Niña maoy responsable sa pagbunok sa ulan sa pipila ka bahin sa nasod.
Sumala ni Quiblat, dugang pag-ulan ang gipaabot sa mosunod nga semana.
Ang publiko iyang gipasidan-an nga magmatngon kanunay sa epekto sa pagbunok sa ulan sama sa baha o lunop ug pagdahili sa yuta sa risgo nga dapit.
Ang hepe sa Pagasa Visayas nagkanayon nga kasarangan ngadto sa kusog nga pag-ulan uban sa dugdog ug kilat, kusog nga hangin ang posible ning semanaha sa Sugbo, labina sa Naga City ug San Fernando ug parte sa Minglanilla, Carcar City, Toledo City, Balamban, Pinamungajan ug Aloguinsan.