PORMAL nang gidawat ang pagtahan sa 12 ka mga terorista ni 601st Brigade Commander Colonel Oriel Pangcog, kapulisan ug mga opisyal sa lokal nga panggamhanan niadtong buntag sa Sabado, Agosto 13, 2022, didto sa Datu Piang, probinsiya sa Maguindanao.
Gibutyag ni 6th Infantry (Kampilan) Division Chief ug Joint Task Force Central Commander Major General Roy Galido nga una nang nisurender ang tulo ka sakop sa Dawlah Islamiyah Toraife Group sa Bangsamoro Islamic Freedom Fighters (BIFF-Karialan faction) sa Puwersa sa 6th Infantry Battalion, Philippine Army nga gipangulohan ni Lieutenant Colonel Michael Manansala sa nahisgutang lungsod.
Dala sa pagsurender sa mga terorista ang tulo ka tag-as nga matang sa armas, mga bala ug magazines.
Gisundan kini sa pagsurender sa laing siyam ka BIFF ngadto sa mga sakop sa 2nd Mechanized Battalion ubos sa liderato ni Lieutenant Colonel Samuel Nadala Jr.
Dala sa siyam ka BIFF sa pagbalik sa sabakan sa balaod ang usa ka M14 rifle, Garand rifle, kalibre .45 nga pistola, M79 grenade launcher, Barret Caliber .50, M16 rifle, mga bala, magazines ug eksplosibo.
Gikanayon ni MGen Galido nga ang pagsurender sa 12 ka terorista, resulta sa hiniusang paningkamot sa militar, ubang sektor sa seguridad, stakeholders, ug mga local government units (LGUs).
Samtang nakadawat na og inisyal nga tabang ang mga nahisgutan gikan sa lokal nga panggamhanan sa probinsiya.
Nanawagan si Galido sa ubang BIFF, mga miyembro sa Dawlah Islamiyah nga mosurender na ug manginabuhing malinawon.