NAGPAHIBALO karon ang Philippine Postal Corporation (PhilPost) nga dili motuo sa mga "scam" nga nagkatag karon sa Messenger nga giingong "link" kini nga ayuda sa gobyerno nga gipaagi sa PhilPost.
Sumala sa PhilPost nga unod sa link ang nagkanayong PHLPost National Government Subsidy nga P7,000 diin kon i-click kini dunay mga pangayuon nga impormasyon.
Sa website sa PhilPost, nagpasidaan sila sa publiko labot niini nga "scam" aron walay mabiktima gumikan pangayuon sa "link" ang mga personal ug information data sa biktimahon.
"SCAM ALERT, Online attackers may attempt to gain your personal or financial information or exploit you for financial gain. Please beware," sumala sa PhilPost.
Suma sa ahensiya nga unsa mang mga pahibalo labot sa ilang mga programa mabasa kini sa ilang mga official social media accounts.
"The Post Office is not giving away financial aid or any related program at the moment," dugang sa ahensiya.
Giingon nga ang uban nga mga postal customers nakadawat og mga peke nga email, mga text, ug mga tawag bahin sa pagpadala sa mga package o wala mabayri nga bayad sa selyo sa online.
Kini nga mga pahibalo giingon nga daw gikan sa Philippine Post Office nga mag-aghat sa inosente nga indibiduwal sa pagkumpirma sa personal nga impormasyon niini pinaagi sa pag-click sa usa ka buton o pag-download sa usa ka attachment nga kung maablihan, mahimong ma-aktibo ang usa ka virus ug makawat ang mga information sama sa mga username, password, ug impormasyon sa pinansyal nga account.
Mas maayong mosubay sa mga post sa maong ahensiya sa opisyal nga Facebook niini, facebook.com/PHLPost; sa website www.phlpost.gov.ph diin ang ilang sa email mao ang phlpostcares@phlpost.gov.ph.
Hinuon sa Davao Region wala pay gitaho nga dunay natala ang mga awtoridad nga sama niini nga insidente nga giduhig ang Philippine Post Office.