“Nganang sinabi ning Nwan a Panginwan: Aku tiru ku ing alang kabating
a kabelwan-belwan ning yoga king mambang ning aldo, Bibaswan,
at i Bibaswan tiru na iti kang Manu, ibpa ning metu-ketawan,
at i Manu tiru na naman iti kang Ikswaku.
Iting kakataskatasang kabelwan-belwan metanggap pin kapamilatan
ning alang-patad a talikala ning pamidalan-dalang pamanuru,
at ding nwang ari asanak da king paralang ita.
Dapot king pangalipas ning panaun ing pamidalan-dalan mepatad,
at inya pin nung makananung tagana ing kabelwan-belwan
a iti mengaring mebating na.
Ita pin laung kabelwan-belwan ning pamakitalamitan king Kakataskatasan miyayapse keka kapamilatan Ku ngeni uling ika ing Kanakung talasuyu
at kakaluguran mu naman; inya sa’t asanak mu ing kakatas-katasang kapagmulalan ning kabelwan-belwang ini.”
~ Dalit ning Kakataskatasang Panginwan¦Dangka 4: Sunis 1-3
(The Song of God 4: 1-3)
“Pakikwanan mung apanigaralan ing katutwan kapamilatan ning pamaglapit
king talaturung pangdiwa. Mangutang mapakumbaba kaya at miyapse pamanyuyu kaya.Ing kaladwang mekakilala na king sarili malyari yang midake belwan keka
uling ikit na na ing katutwan.
At nung apanigaralan mu na pin ing katutwan, abalu mung deng sablang mabibye dake Ku la ngan - - at ing ati lu Kanaku, at Kanaku la.
Agya mang metanggap kang pekamakasalanang dili karing makasalanan,
kabud makabili ka king daung ning kamigit-migitang belwan,
alipatan mu na ngan ing laut ding kasakitan.
Nung makananung ing aping lalagablab gagawan nang abu ing tatamban,
O Ardyun, makanyan mu namang ing api ning belwan dadapugan na lang anting abu ding sablang ablas ding makalabwad a kararaptanan.
King labwad ayti, ala nang lusuk makataluktuk at wagas pa king kamigit-migitang belwan. Ing belwang iti ya pin ing malulut nang bunga ding sablang kakabalan.
At ninu mang disnan na na iti adaranas na na ing sarili king sarili na
king malagwang pilandit ning panaun.
Ing tapat a taung makatalbug king kamigit-migitang belwan at ing makasambut karing panamdam na mabilis nang akapirasnan ing kakataskatasang pandiwang kapayapan.
Dapot ding alang balu at alang kapanaligan tau a mikelangan
karing makabulalag a kasulatan e da apakirasnan ing panimanman king Apung Ginu. Para king mikakunung kaladwa alang ligaya keti man king labwad ayni
o king tutuki.”
~ Dalit ning Kakataskatasang Panginwan¦Dangka 4: Sunis 34-40
(The Song of God 4: 34-40)
O anak nang Prita, deng magsantung Kanaku, bista’t mibait lang mababa—
babai, magbaliwas, talagawa—malyari dang dasnan ing kakataskatasang parasan.
Makananu la kadakila kanita ring bramanas, ding makatud, ding talasuyu
at banal a ari atsu keting labwad a kisna king kasakitang ayni a makasuglung
king malugud a kasuywan Kanaku.
Itingid meng parati Kanaku ing isip mu a mimisip kanaku,
manampang kagalangan at sasamba Kanaku.
Uling makagunam kang lusuk kanaku, bitasa ing miras ka Kanaku.”
~ Dalit ning Kakataskatasang Panginwan¦Dangka 9: Sunis 32-34
(The Song of God 9: 32-34)
“Ing keslagan ning aldo, a sasaul king dalumdum ning mabilug a yatu,
manibatan ya Kanaku. At ing keslagan ning bulan at keslagan ning api
manibatan la naman Kanaku.
Lulub Ku karing balang labwad, at ing kapamilatan ning Kanakung upaya mandatila la king karinan da. Magi kung ing bulan at king kapamilatan na niti pagkalub ing sabo ning ye karing sablang tanam.
Aku ing api ning pamaglaso karing balang katawang mabye,
at Aku ing angin a ning bye, palwal at palub, a king kapamilatan da
lalasawan ko ring apat a kauryan ding pamangan.
Makalukluk ku karing pusu ring balang metung, at manibat Kanaku
ing pamananda, belwan at pamangalingwan. Kapamilatn ding sablang aklatbelwan makikikilala Ku; tutwanang Aku ing menipun karing sablang pamanigaral
karing aklatbelwan, at Aku ing makibalu karing aklatbelwan.
Ating adwang kauryan ding lelangan, ding magkamali at ding e magkamali.
King makadiwang labwad balang metung a lelangan mayayaus yang alang kamalyan.
Lele ding adwang deti, ya pin ing peka-dakilang mabibye pangatau,
Ya ing Panginwan, a linub kareting labwad a reti at manese karela.
Pauli ning makapaymbabo Ku, lagpas karing magkamali at e magkamali,
at pauli ning Aku ing Peka-dakilang dili, pagmasusyan da Kung agnan
karing labwad at karing aklatbelwan anting Kakataskatasang Panginwan.
Ninu mang makibalu Kanaku anting Kakataskatasang Pangatau ning Punbatala, a alang pamikakunu, masasanak a ya ing makibalu king sabla, at susuglung ne
ing sarili na king tibubus a makaparikil a kasuywan, O anak nang Barat.”
~ Dalit ning Kakataskatasang Panginwan¦Dangka 15: Sunis 6-12
(The Song of God 15: 6-12)
***
Alang tune guru o talaturu a malyaring ipasyag nang ya guru ya nung ya mismu e ya dinalan pamanigaral lalam ning pamanuru ning guru na. Ninu mang sasabing ya guru ya at ya mu ing kaylangan turu kekatamu dapot ya sasabyan na a ala yang guru-e ya tune guru. Mumulangan na la mu ring makirandam kaya.
Deng sunis a ati lu king babo dirinan da katamung ditak a belwan dikil king guru at nung ninu ing pigmulan a guru. Ing pigmulan a guru ya pin ing Kakataskatasang Panginwan o ing Dyos at ding pekapakamalan nang dalise talasuyu ila pin ding kayalili na.
Makanyan man, e ya malyaring maging guru ing ninu man a e dinalan king pamanigaral lalam ning guru o talaturu a nung nu ing belwan na menibat king alang patad a pamidalan-dalan ding talapagaral ning dalise guru a manibatan king pigmulang Guru a ing Kakataskatasang Gurung alang aliwa nung e ing Dyos.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.