IYAAN midunggab sa iyang pag-umangkon nga menor de edad kay nagpunay og yawyaw human gibadlong nga dili mokaon sa isdang barilis.
Niresponde ang mga tinugyanan sa Mobile Patrol Unit sa Lapu-Lapu City Police Office uban ni Maribago barangay councilor Arvin Abing sa Sityo Kabatuan, Barangay Maribago, Lapu-Lapu City, kaganihang 9:00 sa buntag, Agosto 15, 2022.
Asoy ni Konsehal Abing sa dihang nahinabi sa Superbalita Cebu, gibadlong ni Marife Luchavez ang iyang pag-umangkong babaye nga 17 anyos nga dili mokaon sa isdang barilis sa ilang pamahaw tungod kay aduna kiniy allergies.
“Gitambagan siya nga ayaw’g kaon ana kay mao ra ba nay hinungdan nga gi-rescue sa nars sa health center. Akong giingnan nga pagpalit og imong sud-an kay bawal man ka ana,” saysay ni Marife.
Inay nga mopatuo, giingong nagyawyaw ug matod pa mibuhi og hait nga pulong ang pag-umangkon batok sa iyaan, hinungdan nga nagkalalis ug nisangpot sa dinunggabay.
Matod pa ni Abing nga nasamdan ang inahan ni Marife sa dihang mipatunga sa maong away ug gidala sa barangay hall aron nga husayon ang duha ka habig. (Flor V. Querubin)