MILAGRONG nabuhi ang usa ka mechanic human kini giayo'g tigbas alas 12:20 sa tungang gabii Lunes, Agosto 15, 2022 sa Purok Malunggay, Lopez Jaena Extension, Barangay Zone 1, Digos City.
Ang biktima giila sa Digos City Police Station nga si Roberto Tabasa Camarillo, 62-anyos, nagpuyo sa maong lugar.
Subay sa imbestigasyon sa kapulisan, samtang anaa sulod sa iyang balay ang biktima kalit miabot ang suspek nga si Rolando Capa, 61-anyos.
Bitbit sa suspek nga edaran ang lagaraw, diin una pang nagkalalis ang duha ug gilayong gitigbas sa suspek ang biktima tumong sa ulo ug walang bukton niini.
Nakahigayon sab ang biktima og balos kinsa nakapunit kini og kahoy ug iyang nabunalan ang suspek nga naigo sa ulo ug sa bukton.
Ang duha pulos gidala sa ilang mga silingan ngadto sa Davao del Sur Provincial Hospital diin sila gitambalan.
Nasayran nga may daan nang bangi ang duruha tungod sa away sa yuta.
Padayong naghimo og imbestigasyon ang kapulisan sa Digos City Police Station labot sa hitabo.