MAHITABONG magmatngon karon ang mga giingong "tsismosa" gumikan kay adunay ipasar nga balaud aron masilutan ang si bisan kinsa nga magpakatap og "fake news."
Sa report sa ABS-CBN News Online, gibutyag ni Waray Representative Florencio Gabriel Noel, nga iyang giduso ang pagpanday sa Cybercrime Prevention Act of 2012 pinaagi sa House Bill 2971 nga modugang sa silot ngadto sa mga magpakatag og fake news.
"Kung sino nag-propagate ng fake news at yung nag-share nito are the ones liable under the hopefully... amended act ng Cybercrime Prevention Act," ingon ni Noel.
Giingon ni Noel nga ubos sa maong sugyot-balaudnon, ang mga Marites mapriso sud sa walo ka tuig gumikan sa ilang mga posts.
"Warning natin sa mga gustong mag-Marites para lang sa kanilang baka personal satisfaction, mag-ingat tayo para 'di tayo makasakit," sumala sa magbabalaod.
Matud ni Noel nga iya kining gitugyan sa Committee on the Revision of Laws aron madeterminar ang multa.
"With regard the fine, the civil liability, I wasn't even thinking of that. Mine is just to prevent talaga what we call now fake news or nagma-Marites news lang diyan," niya pa.
Nagpagula sab sa iyang opinyon ang usa ka Dabawenya nga si Helen Torres-Ruiz, 45-anyos, usa ka full-time nga inahan, alang niya usa kini ka pagsupak sa katungod sa Freedom of Expression nga nakalatid sa Bill of Rights sa 1987 Philippine Constitution.
"Dayag kaayo nga masupak gyod ani nga House Bill ang naa sa Bill of Rights, katungod nato na eh, ang importante tinuod ang imong giingon. Kung Marites lang pod, kinahanglan nga di pataka og pakatag og istorya or post kung di man lang tinuod," ingon sa nahisgutan.
Miangkon sab ang usa ka alyas Gerlie, 44-anyos nga taga Jerome, Barangay Lapulapu, Agdao Davao City nga kung masilotan siya niini nga balaud pag-abot sa panahon, higayon kuno nga magbag-o siya, apan sa wala pa ang balaud, magpadayon siya nga makig-tsismis sa iyang mga kumare.
"Lami man mag-tsismis sab oi, abot ngano, di kompleto akong adlaw di ka-istorya sa akong mga silingan, nailhan na gud mi nga mga Marites sa among kalye," sulti ni Gerlie kinsa perte katawa sa pagsaysay sa SuperBalita Davao.
Hinuon, usa ka pa sugyot-balaudnon kini, apan kung mopasar kini, lagmit makubsan ang mga giingong marites sa katilingban.